Super Suroy: Taska's Home Garden hang-out sa plantito, plantita

Hulagway kuha ni Charry Lane Coronel
Hulagway kuha ni Charry Lane Coronel

USA ka ba plantito o plantita?

Aniay usa ka lugar nga haom alang sa mga mahiligon og tanom o misitas nga ang pag-atiman sa mga tanom maoy gihimong past time.

Ilabi na ang tanom alang sa uban magsilbi nga stress reliever taliwala sa mga suliran ilabi na karong panahon sa pandemiya.

Pabugnaw sa mata ba ang inyong gipangita? Suroyon ta ang Taska’s Home Garden nga nahimutang sa Sitio Luyo, Barangay Adlaon, bukirang bahin sa Dakbayan sa Sugbo.

Hilig

Sama sa uban, nabuhi ang hilig ni Jeslie Medrano sa pagpananom atol sa lockdown resulta sa Covid-19 pandemic dihang mipatuman ang iyang trabahoan og work-from-home setup. Usa ka certified plantita, giangkon ni Jeslie nga aduna gyud siyay “green thumb” o kahibawo nga mopatubo og mga tanom.

Matud ni Jeslie nga kadtong gipa-ubos pa sa enhanced community quarantine ang Dakbayan sa Sugbo niadtong 2020, gihimo niyang kalingawan ang pagpananom.

Ang kaniadto nga bakanteng luna nga kabahin sa nataran gawas sa ilang panimay ang na-transform na karon.

Nahimong labong ug dili lang kolor nga berde ang midominar sa ilang hardin apan nagkadaiyang kolor sa mga tanom ang anaa sa palibot.

Napuno na sa nagkadaiyang klase sa mga tanom nga sagad mga ornamental plant.

Koleksiyon

Pipila sa iyang plant collection mao ang black ug red cardinal, rubber tree, philodendron, white wizzard, ug cobra fern.

Niadto lang Hunyo 2020 nagsugod og pagpamaligya si Jeslie sa iyang mga tanom online.

Ang presyo naa sa P100 ngadto sa P7,000 depende sa klase sa maong tanom nga ma-uyonan sa kustomer.

Tungod kay daghan ang nagka-interes sa iyang plant collection nasabutan sa iyang pamilya nga ablihan kini sa publiko.

Inanay usab nga gipanindot o gipalambo ni Jeslie ang ilang garden pinaagi sa pagbutang og gamay nga gazebo, pond ug pathways.

Ang water source sa ilang pond naggikan sa tubod sa maong lugar nga mao say kuhaan sa aron nga ibisbis sa mga tanom.

Sa gustong mo-relax adunay lantay nga ginama sa kawayan nga mamahimong kalingkoran diha sa landong nga hardin.

Free

Libre ang pagsulod sa garden apan giawhag lang ni Jeslie ang mga guest nga dili hilabtan ang mga tanom ug dili magbilin sa ilang mga basura. Tinguha karon ni Jeslie nga padaghanon pa ang iyang koleksyon.

Sa kadtong buot mosuway sa gardening, tambag niya nga magsugod una sa klase sa tanom nga dali patubuon o kadtong dili kinahanglan nga i-gam pag-ayo.

Unsaon pag-adto?

Di moabot og usa ka oras ang biyahe gikan sa JY square sa Barangay Lahug padulong sa Taska’s Home Garden sa Barangay Adlaon.

Bintaha kon adunay pribadong sakyanan sa pagpa-ingon sa lugar tungod kay sudlunon ang area.

Aron nga dili masaag timan-i ang landmark nga mao ang Adlawon Vacation Farm.

***

Contributor

Charry Lane Coronel: Lumad nga taga-Lungsod sa Alcoy, Sugbo ug Assistant Multimedia Editor sa SunStar Publishing Inc. gawas nga certified nga hinuroy mahiligon sab siya sa surfing ug mountaineering.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph