PWERTENG lipaya sa Cebu City Hall nga dunay unmodified opinion ang Commission on Audit (COA) sa audit report sa Dakbayan sa 2020. Apan sa pagpagawas sa COA sa ilang findings sa report sa Siyudad, duna silay nakita nga di maayo. Wa diay magpasabot nga way anomaliya nga nakita ang COA sa ilang paghatag sa unmodified opinion.
Ang unmodified opinion nagpasabot nga ang financial statements nisubay sa mga lagda sa financial reporting. Wa magpasabot nga way mga kahiwian nga nakita.
Sa pagsusi sa COA, ilang nakaplagan nga: dunay 632 ka mga tawo nga nidawat sa abag gikan sa Social Amelioration Program (SAP) bisan di kwalipikado; dunay unqualified suppliers nga gi-awardan sa pagpamalit og bugas humay sa Siyudad; way construction agreement tali sa Siyudad ug Leda Construction ug notice to proceed sa pagtukod sa quarantine facility; mas mahal sa nalatid sa Department of Health ang presyo sa KN95 mask nga gipamalit ug uban pa.
Wa moingon ang COA nga dunay anomaliya nga gihimo ang Siyudad. Nitumbok ang state auditors nga dunay wa masubay nga presyo nga gitakda sa kagamhanan, wa masubay nga procedure ug mas mahal o mas dako ang nagasto sa Siyudad nga unta duna may barato.
Sa tubag ni City Administrator Flor Casas, iyang giinsister nga ang unmodified opinion sa COA nagpasabot nga limpyo, way anomaliya nga nalambigit sa tanang mga transaksyon sa Siyudad. Mas maayo pang buhaton ni Casas mao ang pagpasabot og tagsa-tagsa sa mga obserbasyon sa COA kalabot sa paggasto sa Siyudad.
Sama sa pagpalit sa KN95 mask ug pagpalit sa bugas. Kinsa nga kompaniya gipalitan sa masks ug kinsa ang suppliers sa bugas. Kay ang COA report bisan wa mamasangil nga dunay anomaliya kay di man usab nila ni gimbuhaton, nagmugna kini og pagduda sa katawhan nga dunay nakabulsa og kwarta.