ANG Cebu City Government mosunod sa tanang mga rekomendasyon sa Commission on Audit (COA) nga nabutang sa iyang audit report.
Mao kini ang gipaneguro ni City Accountant Jerome Ornopia, nga nag-ingon nga ang Siyudad gikinahanglan nga mosunod sa mga rekomendasyon sa COA bisan unsa pa nga rating sa iyang audit opinion.
“Yes, local government units (are) still required to follow COA recommendation, otherwise, those findings will recur in the succeeding years,” matod ni Ornopia.
Ang Siyudad sa Sugbo nakadawat og unmodified opinion gikan sa COA sa ilang 2020 annual audit report, bisan sa daghang mga obserbasyon nga gitumbok sa COA.
Matod ni Ornopia nga ang LGU mapakyas sa pag-angkon sa unmodified opinion kon ang mga rekomendasyon o findings sa COA daghan na kaayo.
“If the recommendations/findings are material na, mao na nga dili gyud ta ka obtain unmodified opinion,” matod ni Ornopia.
Samtang si Cebu City Administrator Floro Casas Jr., sa lahi nga interview, niingon nga ang Siyudad mogamit sa tanang mga rekomendasyon sa COA isip iyang giya sa umaabot nga mga transaksyon.
Kay tumong usab nila nga makakuha og unmodified opinion alang usab sa 2021, matod ni Casas nga “these recommendations will definitely guide Cebu City.” (JJL)