GRABE ang kahimtang sa mag-uuma human gilamoy sa corn sheller o galingan sa mais ang iyang tiil alas 9:45 sa buntag, Huwebes, Hulyo 15, sa South Upi, Maguindanao Province.
Giila ang mag-uuma nga si Fidel Molagey, 35, minyo, molupyo sa Barangay Poblacion sa nahisgutang lungsod.
Matud sa igsuon ni Molagey nga si Alvin nga misaka ang iyang magulang sa taas nga bahin sa corn sheller og gigamit niya ang iyang tiil sa pagdasok sa mais ngadto sa makina.
Apan aksidente nga gikaon sa corn sheller ang tuo nga bahin sa tiil padulong sa paa niini ug naputol.
Daling gipawong ang makina ug gitabang si Molagey sa iyang mga kaubanan padulong sa South Upi District Hospital, apan gibalhin dayon sa Cotabato Regional and Medical Center (CRMC) sa Cotabato City.
Sa pagsuwat ning balita, anaa matud pa sa grabeng kahimtang ang biktima ug wala pa makamata human maputol ang paa. (Edgar E. Fuerzas)