SANTO TOMAS, Davao del Norte -- Dako ang kalipay sa 380 ka mga barangay tanod human sila nakadawat sa ilang tag P3,000 nga honorarium ubos sa Evangelista administration.
Sa report gikan sa Santo Tomas Municipal Information Office, nasayran nga sila kadtong gikan sa 19 ka mga barangay ang nakadawat sa ilang honoraria gikan sa bulan sa Enero ngadto sa Hunyo ning tuiga.
Kini kabahin sa pag-ila ug pagpasalamat sa kontribusyon sa mga tanod aron mapabilin ang kahapsay ug kalinaw lang sa mga Tomasinos sa mga barangay ubos sa administrasyon ni Mayor Ernesto Evangelista.
"Gisugdan na nato ang pagpanghatag sa honorarium sa mga barangay tanod isip pag-ila sa ilang mga nabuhat sa ilang ka barangayan. Ang pagpanghatag og honorarium sa mga barangay tanod, usa na ka permamenteng programa sa atoang Santo Tomas LGU (local government unit). Ginabuhat nato kini para dugang kadasig sa ilang trabaho labi na ang pag-maintain sa peace and order sa ilang kabarangayan," pamahayag ni Mayor Evangelista niadtong Huwebes, Hulyo 15.
Ang 380 barangay tanods gikan sa Barangay Tibal-og, Barangay San Jose, Barangay New Katipunan, ug Barangay Magwawa, San Miguel, Barangay Kimamon, Lunga-og, Kinamayan, Talomo ug Pantaron.
Nagpadayon Biyernes ang pagpang-apud-apod sa honorarium alang sa mga tanod sa Barangay Tulalian, Balagunan, Bobongon, La Libertad ug New Visayas, Barangay Esperanza, San Vicente, Salvacion ug Casig-ang.
Uban sa mayor diha sa distribution sa honorarium si Councilor Ronald Dimaya, kinsa mao ang chair sa Committee on Peace and Order sa Sangguniang Bayan.
Matag kuwarter ginahatag alang sa mga barangay tanod ang honorarium nga mokantidad og P3,000. (Jeepy P. Compio/Santo Tomas MIO)