TAGUM CITY -- Ulahi na ang pagmahay alang sa unom ka mga lalaki nga nadakpan sa Philippine Drug Enforcement Agency (PDEA) sa Davao del Norte, kauban ang Philippine Drug Enforcement Unit-Provincial Intelligence Unit (PDEU-PIU) sa Davao del Norte Police Provincial Office ug Tagum City Police Station atol sa buy-bust operation ala,s 8:30 sa gabii, Hulyo 15, 2021 didto sa Purok 29, Iga-uy, Barangay Madaum.
Sumala sa impormasyon gikan sa PDEA-Davao Region, target nila ang usa ka Ace Robert Chio ug Corazon Samillano, apan nakasibat si Chio human nabantayan niini ang presensiya sa awtoridad.
Wala sab nakaikyas ang mga bisita sa maong takna nga giingong anaa sud sa gihimong drug den sa duha ka suspek.
Nakuha sud sa drug den ang walo ka mga pakite sa gituohang shabu nga motimbang sa 21 gramos nga dunay street value nga P300,000.
Gipangkustodiya na ang mga dinakpan ug giproseso ang kasong pagsupak sa Republic Act 9165 kun Comprehensive Dangerous Drug Act of 2002 ang ilang atubangon didto sa korte. (Jeepy P. Compio)