NAGPAHIMANGNO ang awtoridad nga bantayan gayod sa mga ginikanan ang ilang mga gagmay nga anak aron di masusama sa usa ka 6-anyos nga batang lalaki sa Davao City nga nakatulon og P5 sensiyo.
Sa impormasyon, nasayran nga niadtong Hulyo 5, 2021 gidulaan sa bata ang sensiyo, giaksyonan og paak-paak ug iyang gitamoyan, dihang kalit kining natulon.
Gilayong misumbong ang bata sa inahan kinsa nataranta sab ug mipasulay sa iyang anak sa pagpaluwa niini. Apan pakyas kay wa kini maluwa sa bata.
Duha pa ka adlaw una nadala ang bata ngadto sa Southern Phililppines Medical Center.
Makita sa X-ray result ang sensiyo sa tilaok banda sa bata nga hinay-hinay na hinuon og panaug paubos sa tiyan.
"Makaginhawa man siya og tarung ug makakaon pud. Pero human ang duha ka adlaw nagareklamo na siya nga sakit iyang tutunlan mao nga gidala na namo sa ospital," sumala sa inahan sa bata.
Human makauli sa ospital, migawas ra sab ang sensiyo nga naapil sa hugaw human mihatag og tambal ang doktor.