WA MAKAPIRMA og kontrata ang Sugboanong rookie nga si Jerie Pingoy sa Phoenix Fuel Masters.
Kini human gipalabi sa Fuel Masters ang batan-ong gunner nga si Michael Calisaan ug ang beteranong si Bryan Faundo nga malakip sa 15-man roster alang sa Philippine Cup nga sugdan karong adlawa sa Ynares Sports Complex.
Gawas kang Pinggoy ang laing rookie draftee nga wa usab makahulbot og luna sa Phoenix mao si Reymar Caduyac.
Kon kahinumdoman, ang upat maoy nag-ilog sa duha ka puwesto nga nahabilin sa team aron pagkompleto sa lineup sa Phoenix nga ubo sa pagdumala ni coach Topex Robinson.
Sa kasamtangan, wa pa ibutyag sa Fuel Masters kon unsay ilang plano ni Pingoy ug Caduyac apan wa usab isalikway ang posibilidad nga ibutang ang duha sa ilang 3x3 team alang sa inagural nga edisyon sa PBA 3-on-3 edition.
Si Faundo, 37, kinsa maoy last-minute choice kinsa aduna nay 10 ka tuig nga eksperiyensiya sa PBA ubos sa lainlaing teams, gipapirma og usa ka conference nga kontrata.
Samtang si Calisaan, ang first round pick sa Magnolia sa 2019 draft, gipanglantawan nang daan sa team apan wa pay siguro kon asa nga position ibutang. Nakapirma siya og usa ka tuig sa team.
“Faundo is given a short-term contract muna for one conference,” matod ni team manager Paolo Bugia. “But of course, (the contract) is subject to extension based on his performance.”
Si Pingoy, taga Lahug dakbayan sa Sugbo, nagsugod isip high school varsity player sa University of Cebu sa wala pa kini mobalhin Far Eastern University (FEU).
Sa iyang pagpatong sa kolehiyo, mibalhin usab siya sa Ateneo De Manila University ug katapusang nakaduwa sa UAAP ubos sa Adamson University.
Siya anak ni ex-PBA player Jerry Pingoy, kanhi sakop sa University of the Visayas (UV) Green Lancers. (JBM)