NAPUKAW ang panagsungi tali sa Japan ug South Korea sa taliabot nga Tokyo Olympics. Ang South Korea mipasidaan sa Japan sa dili pag-isa sa ilang Rising Sun flag atol sa panagtigi sa kalibotanong paugnat-sa-kusog.
Para sa South Korea, ang maong bandila nagtimaan sa panaugdaog, gigamit kini sa militar isip simbolo sa imperyalismo ug kapakyas sa Japan sa pagsibog sa kabangis sa ilang kagahapon sa pag-okupar sa Korean peninsula.
Giawhag sab ang Japan pag-usab sa paralympic medals nga dunay desinyo sa maong bandila. Duha diay ang bandila sa Japan nga mao ang nasudnong bandila ug ang rising sun.
Sa wala pa ang ikaduhang gubat tali sa Pilipinas ug Japan, ang mga Hapon miokupar sa South Korea. Bangis ang pagdumala, giulipon, giilog ang katigayonan ug gipugos sa pakighilawas ang kababayen-an.
Miinit ang bangis kay miinsister ang Japan nga dili but-an sa pagpakayab sa ilang Rising Sun Flag alang sa ilang mga atleta sa Tokyo Olympics.
Sa 1905, ang Korean Empire nahimong protektor sa Japan nunot sa gitiman-an nga Japan-Korean Treaty. Apan giulipon sa Japanese rule sa 1910-1945. Ang pag-ulipon sa South Korea natapos sa dihang misurender ang mga Hapon sa World War 2 diin ang armadong kusog sa US ug Soviet Union miokopar na sa teritoryo.
Sa 1941, ang mga Hapon mihugpa sa Pilipinas. Giduslak og bayonita ang kabataan, gipamatay ang katigulangan, gisakmit ang katigayonan ug gibinaboy paglugos ang kababayen-an. Miulbo ang World War 2 sa 1942-1945.
Gilabanan ang Pilipinas sa Amerika pinangulohan ni Hen. Douglas McArthur. Gipaslag og bomba ang Nagasaki ug Heroshima nga gikampohan sa mga Hapon.
Mibanaag ang kagawasan sa Marso 1945 sa dihang midunggo ang pwersang Amerikanhon sa Talisay nga nakapatakas sa mga Hapon. Liberasyon sa Hulyo 4, 1946.