ALAS siyete sa gabii niadtong Huwebes, Hulyo 15, si Amie Talumia gikan nga nagpalit og pagkaon para panihapon. Sa sidewalk nga iyang gisubay iyang gipunit ang gilukot nga pulos tibuok nga usa ka libo ug kinyentos pesos diha sa sidewalk.
Natayming nga diha ra ko sa iyang duol naglingkod, iya kong gipahibalo sa kuwarta nga iyang nakit-an. Ako siyang gitambagan nga hiposon kini total dali ra siyang madumdum kung mangita na ang tag-iya.
Si Amie usa sa mga tindera sa tindahan sa 7 Eleven sa Barangay Cogon Pardo, Cebu City. Sa pagkakita niya sa maong kuwarta, nag-uniporme pa siya kay duty pa niya niadtong tungora. Ni-break aron manihapon.Iyang gi-turnover ang kuwarta ngadto sa iyang supervisor nga si Merxan Quizon.
Wa magdugay nibutho ang usa ka babaye nagpatabang nga masubay sa ilang CCTV ang iyang transaction niadtong gabhiuna. Nakita ug napamatud-an nga siya usa sa mga kustomer. Ang oras nga didto siya sa tindahan wala pay alas siyete. Iyang gisultian si Merxan nga nagsubay siya sa iyang mil kinyentos pesos nga nawala.
Si Amie nakapunit sa maong kantidad distansiya ra maong tindahan. Ang sunod nga pangutana kung iin siya padung human sa iyang transaksiyonb a tindahan.
Ang iyang giingon nga niadto siya sa usa ka botika, dili layo sa natagakan sa maong kuwarta. Ang oras nga nisud siya sa tindahan ug ang iyang pag-adto sa botika nitakdo sab sa oras nga napunitan ni Amie ang maong salapi.
Basi ning maong mga serkumtansiya nabalik sa tag-iya ang maong salapi. Salamat kang Amie Talumia nga taga isla sa Butan, lungsod sa Carlos P. Garcia. Bohol. Tungod sa iyang pagka honest may kasingkasing nga nagmalipayon. Ambot na lang kong lain pay nakapunit.
***
Diha toy usa ka higayon nga ang akong paryente nga opisyal sa PNP, akong nahinagbuan sa gawas sa Headquarters sa PRO-7. Iya kong gipahibalo sa iyang nadawat nga order pagdumala sa usa ka police station sa usa ka lungsod sa habagatang Sugbo. Sanglit naghinangat ang Semana Santa niadtong higayona, ako siyang gipahinumdoman sa dili pagkompiyansa sanglit usa sa nag-unang tourist destination ang iyang bag-ong assignment. Han-okanan kini sa daghang bakasyonista.
Ang gipasabot nako nga dili mokompyansa, di tungod kay naglantaw ko og kagubot nga mahitabo. Ang akong gipasabot niya mao ang mga reklamo unya sa mga bisita batok sa mga mapahimuslanon. Sama sa ubang habalhabal driver nga kusog mamunal sa plitihan. Pagpahimulos sa abang sa mga pumpboat. Mga mapahimuslanon nga tour guide. Mga entrance fee nga taga langit. Mga bayranan sa cottage, lamisa, video K, ug uban pang bayrunon nga wala masubay sa balaod.
Akong gisugyot niya nga makig-alayon siya sa munisipyo pagtino sa tinud-anay nga bayranan nga gipatuman. Makiglambigit siya sa mga tag-iya og resort ug dive shop para maklaro ang hustong bayad.