DUGAY ko nangangha kay wa dayon ko katuo ug kadawat nga ang akong suod nga higala nga si anhing Nenet nga kalit nga mipanaw sa laing kalibotan.
Nagtuo siya pirmiro nga ang iyang gipamati kumon ra nga arthritis. Gani magtakiang na siya kung maglakaw sa kasakit. Wa niya damha sa iyang pagbisita sa doktor nga cancer sa kabukugan kon bone sarcoma na diay.
Gidali dayon siya pagpa-chemotheraphy apan human sa 3 ka sisyon, nakabsan siya sa iyang ginhawa og mipahuway sa dayon. Subo ang nahitabo ni anhing Nenet kay labihan gayod kadto pagka-matinabangon sa buhi pa.
Tungod ini, naingganyo ko pagpa-bone density test para matino sab ang sitwasyon sa akong kabukugan labi na kay 50 kapin nako unya nag-menopause na.
Tuod man mitawag sa akong doktor pagpahibalo nga duna koy osteoporosis kon pagkahuyang sa akong kabukugan unya delikado na sa disgrasya kay hinayhinay kining mangapulpog kung di maabagan bisag gamay lang nga lihok sama sa pagpangalsa o pagduko.
Matod sa Mayo Clinic kining osteoporosis makaapekto sa babaye ug lalake bisag asa pa ang kagikan o lahi, puti, itom, o tabunon nga sama nato apan ang labing daghan ug taas nga porsiyento nga ma- ingon ini ang mga edarang babaye (nga nag-menopause na) nga taga Asya o dunay lahing puti sama sa mga Amerikana.
Kasagarang simtomas ini pagpanakit sa likod (posibling pagka-fracture o collapsed sa vertebra), paghugo sa lawas o kaanam og ka mubo, bako og pamostura kung magtindog unya dali ra kaayong mabalian sa bukog.
Ubang hinungdan mao ang kakuwang sa calcium, pagka-pilian sa pagkaon nga mopaingon sa ka kuwang sa timbang o pagkadaot, pagpunay og lingkod unya kuwang sa paglihuklihok, sige og inum ug panigarilyo.
Unsay angay buhaton?
Insaktong nutrisyon ug ehersisyo para himsog ang kabukugan. Kaon og daghang pagkaon nga taas og protina, pahiyos kung medyo overweight na, tumar og calcium nga dunay bitamina D3 o ba kaha mga low-fat nga dairy products, berde nga mga utanon, ug delata nga salmon o sardinas.