DAKONG garbo sa Sugbo nga naangkon og world-class nga 2.3 ka kilometro nga bike lane sa Cebu South Coastal Road (CSCR) sa South Road Properties (SRP), dakbayan sa Sugbo. Gawas nga nindot ang dan, lab-as ang hangin gikan sa dagat ug berde ang talan-awon tungod sa mga kahoy nga naglumbay sa daplin.
Si Secretary Mark Villar sa Deparment of Public Works and Highways (DPWH) nitambong sa pagsubo kagahapon, Hulyo 16, sa labing unang sa Metro Cebu nga dedicated bike lane o dan nga gituyo sa paghimo alang sa bisikleta.
Nindot ang bike lane sa SRP, apan sa ubang bahin sa dakbayan, kumusta na? Ang bike lane sa SRP kabahin sa 140-km Metro Cebu Bike Lane project nga balor og P150 milyunes nga molatas sa mga dakbayan sa Talisay, Cebu, Mandaue ug Lapu-Lapu nga giingong dul-an na sa 90 porsiyento nga natapos atol sa pagsusi ni Department of Transportation (DOTr) Secretary Arthur Tugade niadtong Mayo 6, 2021.
Tinuod, ang ubang bike lanes sa dakbayan natapos na. Pwera buyag, layo kaayo kon itande sa bike lane sa SRP. Makaluluoy tan-awon. Wala pay semana guba na ang harang sa dan. Ang mga motorista mo-park sa bike lane. Dili maapas og buyag sa awtoridad. Ang mga estabisemento o residensiya nangreklamo usab sa bike lane.
Maayo ang adbokasiya sa paghimo og bike lane apan sa dagan sa kasinatian, daghang kamatuoran nga mitumawa. Una, ang kakuwang sa edukasyon sa mga motorista ug publiko sa benepisyo niini. Ikaduha, dunay mga dalan sa dakbayan nga dili haom og bike lane. Tungod niini, minilyon ang nausik.
Kinahanglan nga tun-an kini og balik base sa nahitabo. Samtang, ang dedicated bike lane sa SRP makita ning sayo pa nga seguradong malampuson, dili sama sa ubang bahin sa dakbayan nga nahimong anugon.