MAG-UUMA ug giingong iyang 19-anyos nga hinigugma gidakop sa Biyernes sa alas 6 pasado sa buntag, Hulyo 16, 2021 human sila malutsi og mga warrant of arrest sa mga kasong rape sa korte.
Sila si Rosel Pepito Platero, 43, alias “ Tikidong,” taga Purok Rose, Barangay Villahermosa, lungsod sa Pilar, mga Isla sa Camotes, Sugbo, ug Noriel Tanza Sumalinog, gisikop sa Anti-Kidnapping Group-Visayas Field Unit (AKG-VFU) nga nipatuman sa warrants of arrest nga giluwatan ni Judge Flor Amor A. Opon, assisting judge sa Regional Trial Court (RTC) Branch 25, Dakbayan sa Danao nga gipetsahan og Hulyo 9, 2021.
Ang duha giakusahang nanglugos niadtong Marso 1, 2021 sa hapon sa 12 anyos nga babaye nga ilang silingan.
Si Sumalinog nga nag-atubang og tulo ka counts sa rape way pyansang gitugot ang korte samtang si Platero nga dunay usa ka count sa rape gitugtang makapiyansa og P120,000 alang sa iyang temporaryong kagawasan.
Ang AKG team Visayas nga gipangulohan ni Police Lieutenant Zosimo C. Ravanes, Jr. giabagan sa Pilar Police Station.
Si Ravanes nga nahinabi sa Superbalita Cebu nagkanayon nga ang amahan sa bata nagtrabaho samtang ang inahan dunay gamay nga deperensya sa pangisip.
Busa, ang bata adto ibilin sa amahan sa ilang kabanay kon siya motrabaho na.
Ang biktima nitug-an nga nagtan-aw siyag telebisyon sulod sa balay ni Platero niadtong Marso 1, 2021 alas 3 sa hapon.
Nananghid siya nga moinom og tubig sa kusina.
Human niyag inom, gibunlot siya ni Sumalinog ug gidala sa kwarto nga tupad sa kusina.
Gipwersa siya sa pagpahubo sa iyang mga sapot, apan nangayo siyag panabang.
Wa na siya makasinggit kay gitabunan ang iyang baba ingon man gisumbag iyang tiyan makaduha hinungdan sa iyang pagkaluya.
“Nadungog niya si Platero, mitawag kang Sumalinog nga “butangig oil imong ______,” saysay sa bata sa affidavit.
Wala na siyay nahimo kay siya naluya, nilampos si Sumalinog paglugos kaniya.
Gihulga siya nga di mosulti ni bisan kay patyon kon iya ning buhaton.
Ang bata nitug-an nga tungod sa iyang kaluya ug kasakit sa iyang kinatawo nga nagdugo, nipadayon na lang siya paghigda sa kuwarto.
Giusban
Pagka-ugma, Marso 2, sa alas 4:00 sa hapon, sila si Platero ug Sumalinog ningsulod sa lawak ug gilugos pag usab ang 12-anyos.
Nianang alas 6:00 sa gabii sa Marso 2, 2021, giusban siyag lugos ni Sumalinog hinungdan nga wa na siya makauli .
Sa Marso 3 na sa siya nakuha sa iyang amahan, apan wa siya mosulti sa kahadlok.
Giingong si Platero nisulti sa amahan sa bata nga giregla siya ug iyang gipalayat og katulo sa hagdanan isip palihi mao nga nagkadugo.
Gialsa ang bata sa iyang amahan tungod sa kaluya.
Pagka Marso 5, 2021, nakit-an ang bata sa ilang silingan samtang nagbarog daplin sa karsada nga nagkadugo ang bilahan ug nagping-it sa kasakit.
Nitug-an ang bata sa gibuhat nila ni Sumalinog ug Platero kaniya hinungdan nga gipahiling sa health center.
Si Sumalinog, matod ni Ravanes, gipapuyo ni Platero sa iyang balay bisan kon adunay siyay kapuyo nga 50-anyos kapin.