ANAA na sa 10,983 ang kinatibuk-ang ihap sa mga kaso sa coronavirus disease (Covid-19) sa Cagayan de Oro human nakatala kini og usa ka returning overseas Filipino worker (ROF) ug 77 ka mga local transmissions.
Matud sa City Health Office, sa 77 ka mga bag-ong lokal nga kaso, duha ang mga lokal authorized persons outside residence (Apors), 29 ang mga local index nga mga kaso, 45 ang mga local case with link, ug usa ang patay.
Ang Cagayan de Oro adunay 922 ka mga active cases, 322 niini na-admit sa Northern Mindanao Medical Center ug uban pang mga ospital sa syudad, ug 600 ang mga outpatients.
Nakatala usab og 63 ka mga Covid-positive nga mga kaso nga karon naka-recover. Anaa na karon sa 9,549 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 512.