Niadtong Biyernes, dinhi sa Dakbayan sa Sugbo si Department of Public Works Secretary Mark Villar aron inagurahan ang 129 kilometro nga bike lanes. Apil na niini ang dedicated bike lane sa may South Road Properties nga dunay gitas-on nga 2.3 kilometro. Naa ni daplin sa Cebu South Coastal Road.
Mao ni ang gisulti ni Sugbo Bike Lanes Board chairman Gerry Carillo pipila ka mga buwan na ang nakalabay. Maayo unta sumpayan sab ni sa DPWH lahos sa Dakbayan sa Talisay.
Mga 8 metros ang akong bana-bana nga gilapdon ani nga bike lane. Alang man gud ni sa magsugat nga mga biker nga padung sa Dakbayan sa Talisay ug vice versa. Karon, kon anha ka na sa CSCR mag bike, di ka na kuyawan nga maigog sakyanan. Ang duha ka kilometro nga lane medyo taas na kon gusto ka lang magpasingot.
Sa 10 nimo ka loop, naa ka nay 20 ka kilometro kapin. Kon 20 ka tuyok, naa ka nay mga 40 kilometro. Maora ka na og gasikad gikan sa Sunstar hangtod sa lungsod sa San Fernando. Aron di ka laayan ug malingaw, mag headset ka samtang magsikad kay this a safer place for bikers.
Makapasigarbo na gyud ta nga duna tay bike lane nga exclusive. Kay atoa man ni, angay ning ampingan ug atimanon mismo natong bikers. Di patakaan og labay og mga basura ug di parkingan kon magdala kag sakyanan.
SUPORTA
Sa natad sa biseklita, labina sa BMX ug uban pang extreme bike competition, sama sa downhill races, kaya kaayo sa Pinoy nga makigkombate sa mga langyaw. Sadly, kuwang kaayo sa suporta ang atoang mga atleta.
Kon duna pa lay structures diin maka train ang atoang mga mahiligon sa BMX samtang mga linghod pa, like 9 anyos pataas, maka produce ta og world champions. Segurado kaayo ko ana. Apan unsaon ang atoang kagamhanan lahi og prayoridad.
Kon wa pa gani mag pandemic, wa sila makahuna-huna sa paghimog network sa bike lanes nga tungod gani sa kakalit, naglisod pa pagdawat ang mga motorista kay gamay pang karsada, kuhaan pa alang sa mga biseklita.
Kon magsugod na og usab sa mentalidad ang mga opisyal sa kagamhanan sa pagsulod sa mga mas batan-ong henerasyon, hayan moluag ang kalibutan natong bikers.
NGANONG GIPAKAT-ON
Ang tanan namong mga anak kahibawo mobiseklita. Bisan ang among kinamanghurang anak nga si Dominic, mga 8 anyos pa lang gani, kahibawo na motindak. Nakat-on siya pinaagi sa among folding bikes nga among napalit gikan sa among higala nga si Jay Garganera.
Nganong gusto man ko makat-on sila? Tungod kay ang pagbiseklita usa sa maayong life skills nga angay kat-unan natong tanan. Huna-hunaa, kon dunay biseklita o motor nga mao ray magamit sa panahon sa katalagman ug emerhensya, gamit ni kaayo. Or kon ganahan silang magmotorsiklo, di na sila magkat-on og balanse.
Alang nako, let the kids enjoy biking with guidance sa ginikanan.