Babaye gipusil, patay samtang gakugos og bata

Wa pay matumbok nga motibo ang kapulisan sa Mambaling Police Station sa pagpusil patay sa usa ka babaye niadtong Biyernes sa gabii, Hulyo 16, 2021 sa Sityo Huyong-huyong, Barangay Mambaling, Siyudad sa Sugbo.

Wa mokooperar ang mga tawo sa dapit sa ilang imbestigasyon sa pagpusil kang Flora Mae Yuson, 32, dunay tulo ka mga anak.

Nagkugos sa iyang pag-umangkon nga usa ka masuso si Yuson samtang nag-estambay sa tindahan sa tuslo buwa dihang niabot ang riding in tandem.

Ang angkas nipusil kang Yuson sa makadaghan.

Patay diha-diha si Yuson human maigo sa mga bala samtang wa maunsa ang iyang pag-umangkon.

Duha ka mga semana ang milabay, nakagawas si Yuson sa prisohan human makapiyansa sa kasong illegal drugs.

Siya nadakpan sa kasong pagpamaligya ug paghupot og drugas sa mga operatiba sa Mabolo Police Station nga ning operate sa Barangay Mambaling pila na ka semana ang milabay

Subayon pa sa mga imbestigador sa Mambaling Police Station ang background ni Yuson isip durugista aron masuta kon duna ba kini gikabangi.

Si Yuson mao ang ikasiyam nga gipusil patay dinhi sa Dakbayan sa Sugbo sulod sa duha ka mga semana.

Ang kapulisan naalarma na ning sunodsunod mga pagpamusil sa Dakbayan sa Sugbo.

Naghimo na silag lakang alang sa dinaliang pagsulbad sa mga pagpamusil ug pagsanta niini pinaagi sa mga pagpatrolya sa kadalanan sa siyudad aron pag-discurage sa mga kriminal. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph