SUPERBALITA CEBU

Napuli modusog motion; nasagmuyo sa suspension

Nasagmuyo ang asssistant general manager sa Mactan Cebu International Airport Authority (MCIAA) nga si Glenn Napuli sa pagkasuspenso niya sulod sa unom ka buwan base sa mando sa Ombudsman.

Kini may kalabotan sa giingong wa niya paghatag og kopya sa National Bureau of Investigation (NBI) sa kontrata sa GMR Megawide Airport Corporation (GMCAC) ug sa usa sa ilang concessionaire.

Matod ni Napuli nga wa siyay ikahatag sa NBI kalabot sa dokumento sanglit wala usab siyay kopya niini o ang MCIAA.

Naglibog siya kon nganong dili na lang sa GMR mangayo ang NBI sa naasoyng kontrata.

Tungod sa iyang kapakyas, gipasakaan siya og kasong gross neglect of duty, grave misconduct ug conduct prejudicial to the best interest of the government sa NBI sa Ombudsman sa kaulohan niadtong Hulyo 7.

Si Napuli maoy nilingkod isip officer-in-charge (OIC) general manager sa MCIAA dihang wala pa matudlo sa Malacanang isip general manager si Julius Neri sa milabayng semana.

Alang kang Napuli, usa ka pagyatak sa iyang pagka opisyal sa gobyerno ang pagsuspenso kaniya.

Nakurat usab siya sa kadali nga pagpakanaog sa iyang suspension order human siya gipasakaan og kaso niadtong Hulyo 7.

“July 7 ila gi-file karong buwana. Pagka Martes, issue dayon. Ang nipirma si (Samuel) Martires gyud ang pinaka head sa Ombudsman. Nga og mo-file ta og case sa Ombudsman, Sir, ang mayor, governor, Philhealth, naay gikawat, ang investigator ang mo-evaluate ana. Mohimo og recommendation una pa na i-approve or disapprove. Pero karon, Sir, way nawala, maski peso, ila gyud gilingkoran. Biliba nako unya dali ra kaayo. Kuyawa sa, mura mag high profile case. Grabe pa man sa billions nga nawala,” matod ni Napuli.

Plano ni Napuli nga mo-file og motion for reconsideration sa iyang suspensyon, apan wa siya makapugong sa iyang pagmahay sa gobyerno nga iyang gialagaran.

Gipasalig hinuon ni Napuli nga dili ra maapektohan ang operasyon sa MCIA sanglit miasumer na man si Neri.

Niadtong Hulyo 16 nagsul-ob og itom ang mga empleyado sa MCIA isip pagpakita sa ilang suporta ni Napuli sa iyang nadangatan.

“Sige mao man nay process, mo-file ko og MR. Pero og dili i-dismiss ang kaso, di ko mo-keep quite ani. Og naay mangutana nako, mosulti ko og tinuod. Wala man gyud nako na ang document. Ang uban makahatag ko unya og wala, maghimo himo diay ko?,” matod ni Napuli.

Ang NBI nipasakag kasong kalapasan sa Anti Dummy Law batok kang kanhi MCIAA general manager Steve Dicdican ug sa mga opisyal sa GMR Megawide tungod sa pag-award sa concession ngadto sa consortium nga wa gipanag-iya og lunlon nga Pinoy.

Ang GMCAC consortium tali sa Pinoy nga kompaniyang Megawide Construction Corporation ug GMR Group nga langyaw.

Matod sa NBI nga ang airport gipadagan sa mga langyaw sama sa Irish, Ghanian ug mga Indian national. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!