Mamahimo nang mogamit ang mga tigbisekleta sa 2.3 kilometro nga dedicated bike lane nga nahimutang sa South Road Properties (SRP), labing unang matang sa Sugbo.
Gibuksan ang dedicated bike lane niadtong Hulyo 16, 2021 nga gitambongan sa mga opisyal gikan sa Department of Public Works and Highways (DPWH) pinangulohan ni Secretary Mark Villar, Department of Transportation (DOTr), ug mga lokal nga opisyal.
Ang dedicated bike lane nga nahimutang sa kilid sa Cebu South Coastal Road (CSCR) apil sa 129 kilometro nga Metro Cebu Bike Lane Network project nga giinagurahan ni Villar, uban sa mga opisyal sa DOTr sa usa ka seremonyas niadtong Biyernes.
Matod ni Cebu Bike Lanes Board chairman Gerry Carillo nga nagsugod ang dedicated bike lane sa mga utlanan sa Dakbayan sa Talisay ug Dakbayan sa Sugbo paingon sa SRP viaduct.
Gipahinumduman ni Carillo ang mga mogamit sa dedicated bike lane nga mag-amping, dili maghimo og exhibition, ug maggamit og mga protective gears.
“Kana atong bike lanes is not used for exhibition. Meaning to say di sila magpalupad-lupad sa bikes, di sila mag ambak-ambak, di nila buhian ang manubila,” pahinumdum ni Carillo.
Ang dedicated bike lane, nga adunay gilapdon nga walo ka metro, kay istriktong alang lang sa mga magbisekleta, pwede sad sa mga joggers, ug uban pa nga maggamit lang og personal mobility vehicle, matod ni Carillo.
Sa tibuok dakbayan sa Sugbo, anaa sa 90 ka kilometro ang bike lanes, ug 20 ka kilometro lang niini ang maingon nga dedicated bike lanes. Kasagaran shared bike lanes na kun magamit sa ubang mga motorista.
Ang shared bike lane, bisan og priority nga makaagi ang mga magbisekleta, mamahimo sad nga makagamit niini ang ubang sakyanan apan kinahanglan nga anaa lang sa mga 20 km. per hour ang dagan.
Si Carillo nibutyag nga paninguhaon sa Board nga maabot ngadto sa 50 porsyento sa tibuok bike lanes sa dakbayan ang matawag nga dedicated bike lane.
Ang DPWH ug DOTr, ingon man ang Dakbayan sa Sugbo nigasto og labing minos P75 milyunes alang sa pagpamutang og bike lanes sa kadalanan sa dakbayan.
Labing dakong pahat nagagikan sa panudlanan sa DPWH.
Sagad sa bike lanes duna untay gilapdon nga 2.5 metros, apan gihangyo nila ni Carillo ang mga opisyal sa DPWH nga kutob lang kini sa 2.3 metros tungod sa kahagip-ot sa kadalanan sa Cebu City.