Gikatahapang drug pusher nga nakapusil sa usa ka pulis sa Dakbayan sa Talisay sa usa ka buy bust niadtong Huwebes sa gabii nitahan sa alas 10 sa gabii sa Biyernes, Hulyo 16, 2021 sa iyang uyoan nga pulis nga nipadala kaniya sa Talisay City Police Station.
Si Efren Espina, high value individual, namusil sa kapulisan sa Talisay atol sa buy-bust sa Sitio Paling-Paling, Barangay Jaclupan, dakbayan sa Talisay niadtong Huwebes sa gabii, Hulyo 15, 2021.
Atol sa operation nakabantay si Espina ug kalit nga namusil hinungdan nga naigo sa tuong bukton si Patrolman Gilbert James Lusica.
Si Police Lt. Col. Gerald Ace Pelare, hepe sa Talisay Police Station, nibutyag nga si Espina nitahan sa kapulisan human makombenser sa uyoan nga si Police Chief Master Sergeant Esperidion Espina, sakop sa Provincial Mobile Force Company.
Si Espina giubanan nila ni Police Staff Sergeant Adriano Bacatan, Police Staff Sergeant Alwin Cabunag ug ni Police Corporal Fedul Fahulas dihang nitahan sa Talisay City Police.
Gibutyag ni Pelare nga si Espina nasamdan sab sa iyang tuong bukton kay nakabawos ang mga pulis, apan di grabe kay tapsing lang.
Wa makabuylo ang mga pulis pagbawos kang Espina atol sa buy-bust kay ang iyang 6 anyos nga anak gihimong taming atol sa pag-ikyas.
Tungod usab sa kangingit sa dapit, nanagana ang mga pulis sa paggukod kaniya.
Si Espina makadaghan na gireklamo sa barangay di labot sa illegal drugs, kon di sa away tali sa pamilya. (GPL)