SUPERBALITA CEBU

Duterte mag VP sa 2022

Presidente Rodrigo Duterte. (File photo)

Modagan sa pagka bise presidente sa 2022 elections si Presidente Rodrigo Duterte.

Gipahibawo kini ni Duterte atol sa national assembly sa PDP-Laban sa Sabado, Hulyo 17, 2021 sa Clark, Pampanga.

Si Duterte nipasabot nga ang iyang pagdagan maoy paghikaw nga makakiha kaniya sila si kanhi senador Antonio Trillanes ug kanhi Supreme Court Justice Antonio Carpio.

Matod niya nga sila si Trillanes ug Carpio nagsige og hulga kaniya sa pagkiha.

“Sabi ng batas na kung presidente, bise presidente ka, may immunity ka. Ay di tatakbo na lang ako na bise presidente,” matod ni Duterte nga gitubag gilayon og pakpak sa mga nanambong nga sakop sa PDP-Laban.

“And after that, tatakbo ako uli...tatakbo uli,” aron di gyud makahigayon pagkiha kaniya sila si Trillanes ug Carpio.

“They can never acquire jurisdiction over my person. Not in a million years,” matod sa Presidente.

Ang pagka immune sa bise presidente gikan sa mga kiha debatihunon pa, kay ang klaro nga immune gikan sa mga sumbong batok sa impeachable nga mga opisyal mao lang ang presidente.

Bisan si Senador Laila de Lima, dihang siya pa ang kalihim sa Department of Justice sa panahon ni anhing Presidente Benigno Aquino III, niingon nga mahimong makiha ang bise presidente.

Nikomentaryo niiini si de Lima kalabot sa pagkihag plunder ni kanhi bise presidente Jejomar Binay kaniadto.

Si Trillanes, usa sa mga grabeng kritiko ni Duterte, niduso og communication ngadto sa International Court of Justice (ICC) kalabot sa gubat batok sa drugas sa administrasyon niadtong 2017.

Ang ICC niimbestigar sa mga reklamong crime against humanity nga gipasaka niadtong 2018.

Apan si Duterte, sa iyang pagpamulong atol sa PDP Laban assembly, subling niingon nga kon legal ang basehan, di sakop ang Pilipinas sa ICC kay wa moagi sa hustong legal nga proseso ang gipirmahang treaty panahon ni kanhi Presidente Joseph Estrada.

Ang Pilipinas ni-ratify sa iyang pagka miyembro sa 2011 atol sa administrasyon ni Aquino.

“Treaties shall form part of the law of the land. So the treaties that are ratified, then published, approved by the president, ito it becomes a law. Failure to do that there is no law,” dugang ni Duterte.

Kon iinsister kini, matod ni Duterte nga mogamit na siya sa “due process’ nga naa sa Constitution.

Si Carpio usab kritiko ni Duterte sa West Philippine Sea (WPS), kansang kinabag-an niini giangkon sa China bisan pa sa hukom sa Permanent Court of Arbitration nga nagdeklarar nga ilegal ang nine-dash Line nga gibasehan sa pagpangangkon sa Beijing.

Atol sa assembly, si Energy Secretary Alfonso Cusi gipili nga presidente sa partido.

Ang assembly gihulagway na ni Senador Manny Pacquiao, presidente sa PDP-Laban, nga ilegal kay way pagtugot sa partido.

Si Pacquiao nipahibawo na sa iyang pagdagan pagka presidente nga wa kauyoni ni Duterte.

Ang duha nga kaalyado kaniadto managkaaway na.

Si Davao City Mayor Sara Duterte nipahibawo na sa iyang posibleng pagdagan pagka presidente sa 2022 elections.

Ang bag-ong mga opisyal sa PDP Laban nanumpa atubangan kang Duterte.

Nisaad pa si Duterte sa mga miyembro nga magpapili sa sunod tuig nga mokampanya siya og tagsa-tagsa nga gipakpakan usab sa mga nanambong. (REV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph