USA ang angol human usa ka awto ug tulo ka mga motorsiklo gidaro sa SUV sa highway sa Barangay Poblacion, lungsod sa Carmen, kagahapon sa alas 11:30 sa buntag, Hulyo 18.
Ang nalandig sa tambalanan mao si Ei Vanesa Garing, 30, dunay kapuyo ug taga Barangay Buhisan, dakbayan sa Sugbo.
Samtang ang nagmaneho sa nakadasmag nga sakyanan mao si Christian Meyer, 54, German national nga naminyo og Cebuana ug residente sa Barangay Dawis Sur, Carmen.
Si Meyer, uban sa iyang pamilya, nagmaniho sa Nissan wagon nga sakyanan.
Matod ni Police Master Sgt. Roy Cabahug sa Carmen Police Station nga nahinabi sa Superbalita Cebu, nagkanayon nga usa ka Honda Civic nga awto ang naapil sa pagkadaro.
Gibutyag niini nga ang Honda Civic gimaniho ni Joselito Peres, 41, ulitawo ug taga lungsod sa Daanbantayan.
Mihunong ang Honda Civic human dunay ni-u-turn sa eskina sa Brgy. Poblacion.
Nihunong sab ang tulo ka mga motorsiklo nga nagsunod padulong sa norte nga bahin.
Sumala ni PMS Cabahug, dihang nahunong na ang awto ug tulo ka motorsiklo, kalit silang gidaro sa sakyanan sa German national.
Matod ni Meyer, kalit ang pag-stop ug ni-brake dayon siya apan na-slide ang iyang tiil ug didto naduot sa gasulinador hinungdan nga nisutoy hinuon kini sa pagdagan.
Tungod niini, nadaro niya ang awto ug tulo ka mga motorsiklo.
Mao kini ang hinungdan nga naangol si Garing. Samtang, naguba ang mga motorsiklo ug ang awto.
Ang mga motorsiklo nga nalambigit sa aksidente mao ang Erox nga gimaniho ni James Jumer, 29, ulitawo ug taga Tres de Abril, dakbayan sa Sugbo; Mio nga gimaniho ni Romel Bendebel, 27, ug taga Barangay Buhisan, dakbayan sa Sugbo, ang iyang kapuyo nga si Vanessa Garing; ug NMAx nga gimaniho ni Wilfredo Abella, 40, taga dan Tupaz, dakbayan sa Sugbo.
Ang mga sakay sa tulo ka ma motorsiklo mosuroy unta sa Safari Park sa Carmen apan wala nahinayon tungod sa aksidente.
Ang German national gibuhian sa kapulisan human siya mismo miabaga sa gastuhan sa biktima sa ospital.
Lakip sa patubag sa danyos sa mga sakyanan nga gipangdaro niya.