NIABISO ang Project Balik Buhay (PBB) nga sirado ang vaccination centers ugma, Hulyo 20, tungod sa holiday o pag-obserbar sa Eid’l Adha.
Ang regular operations sa iyang 12 ka vaccination centers sama sa PBB IEC Vaccination MegaCenter, Sacred Heart School-Ateneo de Cebu, Mendero Medical Center, ug uban pa, mobalik sa pagka Miyerkules, Hulyo 21.
Samtang, ang PBB nagkanayon nga base sa ulahing pahibalo sa Department of Health (DOH) ug National Task Force against Covid-19, ang PBB vaccination initiative makasilbi lang sa magpabakuna gikan sa mga kompaniya ug organisasyon sulod sa Metro Cebu local government units (LGUs),
Cebu City, Mandaue City, Lapu-Lapu City, Talisay City, Consolacion, Minglanilla, ug City of Naga.
Ang PBB nagkanayon nga ang tanang aplikasyon gikan sa mga kompaniya o organisasyon gawas sa Cebu LGUs kansang mga kawani o miyembro nga wala mabakunahi sa PBB, ipada ug i-refer sa ilang tagsatagsa ka LGU ug local city health department.
Ang PBB vaccination initiative, hangtod sa Huwebes nga talaan, Hulyo 14, nakahatag na sa 98,804 doses sa Covid-19 vaccine ngadto sa 68,706 ka indibiduwal; diin ang 27,149 niini, fully vaccinated na. (WBS)