ORMOC City - Gilibkas na ang pork holiday sa dakbayan sa Ormoc sugod niadtong Sabado, Hulyo 17, 2021.
Apan dunay pipila gihapon ka kondisyon aron mapugngan ang pagkatap sa African Swine Fever (ASF).
Pagka Dominggo, Hulyo 18, nidawat na og mga ihawunon nga buhing baboy ang slaughterhouse sa dakbayan sugod alas 8:00 sa buntag hangtod alas 5:00 sa hapon apan ang dawaton, mao kadtong mga baboy nga gikan sa kabarangayan sa Ormoc.
Sa dili pa dad-on sa slaughterhouse ang baboy, ang nagbuhi dapat mangayo usa og certification gikan sa kagawad in-charge sa agriculture ug sa barangay kapitan.
Sa pag-abot sa slaughterhouse, inspeksyunon kini sa meat inspectors ug isyuhan og Veterinary Health Certificate.
Pagka kaadlawon lang ang inihaway ug tanan nga baboy nga gidala sa slaughterhouse ihawon og dungan, wala na’y ibilin o ‘all in’ ug ‘all out’.
Human sa pag-ihaw, pwede na kini dad-on sa aslanan o sa merkado publiko.
Gidili pa ang inter-barangay nga pagbiyahe sa mga buhi nga baboy.
Pananglitan, ang buhi nga baboy gikan sa Barangay Ipil, dili na pwede ibiyahe sa laing barangay. Kinahanglan nga diretso ra gyod sa slaughterhouse.
Modawat sab og buhi nga baboy ug bisan unsang pork products ang Ormoc basta gikan lang sa mga lugar nga walay kaso sa ASF ug dapat iagi sa pier sama gikan sa Cebu ug Bohol.
Ang pork holiday sa Ormoc gideklarar sa mayor niadtong Hulyo 3. (JKDP)