HAPSAY tan-awon ang siyudad sa Sugbo kon imong lantawon gikan sa kabukiran, sama sa dapit sa “Mr. A” didto sa Barangay Busay. Layo ra sa kagahub sa siyudad, sa andar sa mga makina sa sakyanan. Makita nimo ang mga building nga naglumba paingon sa taas ug nisubol nga morag mga uhong.
Makita ang duha ka taytayan nga nagdugtong sa mga isla sa Sugbo ug Mactan. Ang labing una ug karaang taytayan, tingali tungod sa kolor sa pintal niini, morag gitay-an. Makita sab ang ikatulong taytayan gikan sa South Road Properties paingon sa lungsod sa Cordova nga hapit na masumpay.
Ang imong makita gihulagway sa kanta nga nag-ingon, “From a distance/ there is harmony.” Apan kon molugsong ka na sa ubos, sugaton ka sa kahuot sa trapiko. Hapsay unta kini sa panahon sa lockdown. Matod pa sa usa ka motorista, ang trapik maoy unang nibalik sa normal dinhi sa siyudad.
Temporaryo lang ang kahapsay sa trapiko sa siyudad sa Sugbo sa panahon sa mga istrikto nga kurintinas. Naghuot na sab ang trapiko karon kay mao man kini ang normal. Dunay pa kahay kasulbaran ang maong suliran?
Dunay mga intersection sa siyudad nga gibutangan og traffic lights nga dunay numero kon pila ka segundo una mausab ang traffic light gikan sa pula ngadto sa green. Trapik lang gihapon apan malingaw na ang mga motorista sa pag-ihap sa mga segundos.
Apan gipakita sa kahuot sa trapiko nga daghan na ang mga tawo nga nanggawas sa ilang mga panimalay kay ubos na man sab ang siyudad ug lalawigan sa Sugbo sa modified general community quarantine (MGCQ).
Apan kanus-a pa man kaha mahibalik ang tanan sa normal human sa mga lockdown tungod sa Covid-19? Hinay ang pagbakuna nga mao unta ang gisaligan aron mahibalik kita sa normal kon makab-ot na ang gitawag nga herd immunity.
Ang ubang mga nasod, sama sa Singapore, nangandam nga mahibalik sa normal ang inadlaw nga kinabuhi. Sa ilang panglantaw, ang Covid-19, gikan sa usa ka pandemic, mahimo na lang nga endemic sama sa flu, hangga (chicken pox) ug hand, foot and mouth disease.
Matod pa sa multi-ministry task force sa Singapore, “The bad news is that Covid-19 may never go away. The good news is that it is possible to live normally with it in our midst.” Posible ang normal nga kinabuhi bisan sa taliwa sa Covid-19.