SECTIONS
Superbalita Cebu
Wednesday, September 22, 2021
SUPERBALITA CEBU

Nadela: Modagan o dili modagan

Asoy ni

DUNAY daghan ang gitugahan og mga hiyas sa pagdumala og mga position sa panggobyerno. Maoy hinungdan nga sa mga election, ang ilang mga pangalan kanunay nga magbansiwag sa listahan sa mga mananaug. Duna say daghan nga kon ang kwalipikasyon maoy basihan, angayan gyud untang modaug. Apan sa eskotinyo, mamunbon.

Pildi man gani sa ilang kaugalingong presinto. Mao na ang sakit nga kamatuoran sa pulitika. Asa hinuon ning di makamao, maoy modaug. Ang makamao, pildi.

Dili hinuon tanan. Naa lang gyuy sitwasyon o hinungdan nganong di makalusot. Siguro kulang sa pundo. O ang laing hinungdan, dili ilado. Unya nakasakay pa gyud sa grupo nga kulang sa makinarya.

Gihisgutan ko ni sanglit mao ni sagad manghitabo sa matag election. Duna kay gustong padag-on, dili sab gusto sa uban, maong mangamuti panahon sa canvassing. Apan ang sakit kon pinalitay sa boto maoy hinungdan sa kadaugan ug kapildihan. Busa kadtong apil sa kisaw sa pulitika karong panahona, good luck nalang ninyong tanan.

Sa mga nagduhaduha pa, siguroa nga dili mo masayop sa inyong hukom. Basin maputos mo sa utang unya pildi pa. Apan dili ikalimod duna say daghan nga nidaug unya nakwartahan. Balik ta sa pangutana, modagan o dili modagan?

Modagan kay gustong mopaambit sa katakus sa pagdumala. Dili modagan kay way pundo nga ikasugakod sa pangampaniya. Lahi sab nang modagan bisan way kabangkaagan apan daghan og pundo nga ikapamalit og boto. Naa ra gyud natong mga botante kon tugutan nato silang makalingkod sa mga puesto nga para lamang unta sa mga lider nga dili tikasan.

Gahapon akong gikuyogan akong agaw Bobong Nadela, usa ka certified hotelier. Among destinasyon mao ang Barangay Cabiangon sa lungsod sa Pinamungajan. Dunay usa ka dapit sa maong barangay ang iyang tuyo. Sa paghiabot namo sa maong barangay nangita siya sa usa ka halapad nga fish pond nga iyang gibisita 43 ka tuig ang nakalabay. Sa ato pa nagpangidaron pa siya og trese anyos niadtong panahona.

Unya gahapon pa siya nakabalik. Ang nakanindot matod niya kay naa pa ang fish pond nga sa iyang estorya maoy bisitahanan sa iyang papa sa gamay pa siya. Ingon ra ani ka yano ang maong biyahe apan para nako nindot ni palambuon sa barangay. Pagdasig sa mga tawo nga may nindot nga kagahapon sa ilang dapit.

Wala lang gyud mi oras pagduaw sa barangay hall kay gusto nakong iparehistro si agaw Bobong isip usa sa mga bisita sa ilang dapit nga dili taga ilaha apan may mabulokon nga kagahapon. Niingon hinuon si agaw Bobong nga mobalik siya sa maong dapit.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph