NAKADAWAT gilayon og mga pagkaon, tulda, ug mga portable toilets ang mokabat kapin kun kulang 500 ka mga biktima sa sunog niadtong Sabado sa Dumalag 1, Barangay Matina Aplaya, Davao City.
Mismong ang mga staff ni Davao City First District Representative Paolo "Pulong" Duterte ang mihatud sa mga hinabang Dominggo sa buntag, Hulyo 18, 2021.
Mokabat sa 100 ka mga panimalay ang gilamoy sa kalayo ug naapil sa pagkasunog ang Diego Silang Elementary School diin dunay usa ka edaran ang namatay.
Sumala ni Duterte nga prayoridad niya ang pagtabang sa mga nanginahanglan labi na sa susama niini nga hitabo.
"Nag-provide mi og lunch and dinner for three days kay kabalo ta lisod pa sila makaluto sa kaugalingon nila nga pagkaon karong mga panahona. After three days the First Congressional District Office will asses the situation kay nadungog namo nga naay mga silingan nila nga humok og kasingkasing nga nitabang pod kanila," ingon ni Duterte.
Ning kasamtangan, nakig-koordinar sab ang buhatan sa kongresista ngadto kang Davao City Mayor Sara Duterte alang sa mga construction materials aron makatukod sila'g balik sa ilang bag-ong kapuy-an.
"Mag-agad pod mi sa lokal nga panggamhanan sa liderato ni Mayor Inday og unsa pa ang mga panginahanglan sa mga nasunugan. We will coordinate with the office of the mayor labi na gyud sa mga panginahanglan sa construction materials, abot sa panahon maayo na lang bisan gamay makatabang ang first congressional office sa ilang mga panginahanglan," dugang sa kongresista.
Naa na sab ang City Social Welfare and Development Office sa dapit sa pag-validate sa mga nasunogan ug sa paghatag og pasiunang ayuda sama sa pagkaon ug mga gamit sa pagtulog.