NASUTA sa awtoridad nga mitaas ang diarrhea cases sa Barangay Tulalian, Santo Tomas, Davao del Norte gumikan ulahi nang nasayran nga dunay nangasakit kay ang mga biktima di magpa-ospital gumikan mahadlok matakdan sa Covid-19.
Sumala ni Santo Tomas Municipal Health Officer Dr. June Lim nga napili sa mga residente nga nagka-diarrhea nga magpundo lang sa ilang mga balay ug diha na magpa-ospital kung magpadayon ang gibati nga di na gyod maayo.
"Nahadlok sila mangadto diri kay ang uban dili sila gusto magpa-admit sa hospital kay basi'g matakdan sila og Covid-19 o i-declare sila nga Covid-19 positive. Mao kana ang rason nganong ingon ana ang volume sa patients na atong gitabangan," ingon ni Lim pinaagi sa Municipal Information Office sa Santo Tomas.
Nasayran nga nadugang sa talaan ang 124 ka mga pasyente nga mitotal na sa 295 sukad adlaw'ng Sabado, Hulyo 17.
"Nidaghan ang patients nato kay karon lang sila nigawas sa ilahang mga balay para magpatambal. Napugos na sila adto diri sa makeshift treatment facility kay dehydrated naman sila. Mao na ang rason na padayon ang pagtaas sa mga residente naigo sa diarrhea," dugang ni Lim.
Sa maong ihap, 18 ang na-admit samtang gikataho nga duha ang namatay.
Ang lokal nga kagamhanan sa dapit mihimo na og hinanaling aksyon labot sa diarrhea outbreak sa dapit. (Jeepy P. Compio)