TUNGOD sa kahugot sa seguridad labi na sa mga checkpoint sa Davao City gumikan sa pandemya ug pagbatok sa terorismo, wala gyud milampos ang usa ka lalaki nga misulay og pasulod og shabu sa siyudad, adlaw'ng Sabado, Hulyo 17, 2021.
Usa ka alyas Mark, 30, taga Butuan City, ang nasikop sa mga personahe sa Task Force (TF) Davao dihang miagi kini sa TF Davao Bunawan Checkpoint nga nagmaneho sa pula nga kotse.
Sa pagrekisa sa TF-Davao, nakuha sud sa sakyanan sa suspek ang usa ka selopin nga dunay sulod nga gituohang shabu motimbang og 40 gramos ug dunay street value nga P640,000 ug mga drug paraphernalia.
Sumala sa hepe sa Bunawan Police Station Police Major Noel Villahermosa nga hugot kaayo ilang pagrekisa sa mga mosulod sa dakbayan uban sa mga personahe sa TF-Davao nga miresulta sa pagkasikop sa suspek.
Sa kasamtangan, balhog ang suspek sa selda sa Bunawan police samtang giandam na ang kasong pagsupak sa Republic Act 9165 kun Comprehensive Dangerous Drug Act of 2002 nga atubangon niini didto sa korte. (Jeepy P. Compio)