NAANAD na ang atong mga kaigsuonan niining pandemic Covid-19 nga halos usa ka tuig na'g tunga sa pag-abot dinhi sa atong nasud sa Pilipinas sukad niadtong Pebrero 2020.
Sa pagkakaron, mokabat na ngadto sa 26,000 ka mga tawo ang nangamatay niining maong virus pero makapatingala lang tungod kay kon wala na ang maong virus, naa dayo'y laing variant nga mopili bisan kon walay travel history nga gidala ang tawo dinhi sa atong nasud.
Sama sa nahitabo karon sa Indonesia nga nahimong segunda sa nahitabo sa India nga dili na matabang sa ilang cremation. Gitapok na lang ang mga nangamatay ug gidauban.
Sa Indonesia, nagpalapad sa ilang sementryo ug didto gipanglubong ang mga tawo nga biktima sa Delta variant.
Dinhi sa atong nasud, magpasalamat kita nga wala kana mahitabo dinhi, pero wala sad ta nangandoy niana.
Bisan pa sa pagpaningkamot sa atong gobyerno nga ang tanan ma bakunahan, apan aduna gyuy mga two nga di gyud magpabakuna tungod kay duna man sila'y nakita nga bisa'g gibakunahan na, namatay lang gihapon.
Pandemic Covid-19 wala na ba ni katapusan? Kini ang usa ka dakong pangutana nga way makatubag. Usa ka doktora nga Chinese mitug-an nga kining covid-19 usa ka "man-made" virus gikan sa Wuhan, China. Tingali nasayud na niini ang World Health Organization (WHO) pero ang ilang trabaho karon mao ang pag-approve sa mga vaccine nga hinimo sa mga higanteng mga nasud.
Ang America ug uban pang mga nasud nga daghang nangamatay sa "man-made" virus nga giingong hinimo sa China wala sila'y aksiyon kon angay ba kining pabayron sa mga milyon-milyon nga mga tawo nga namatay sa ilang gihimong kagaw.
Karon kon inyong namatikdan mora og dili na mahadlok ang mga tawo sa virus bisan og unsa pa ni nga variant. Supakon na gani nila ang mga protocols kay gipul-an na og sampong sa ilang ilong sa face mask ug ang uban panglukdohan na lang ang face shield kay gikapoy na.
Daghan nang mga negusyante ang nalugi ug nagsira sa ilang mga negusyo. Daghan nang mga trabahante ang nawad-an og trabaho. Bisan ang panudlanan sa atong gobyerno miubos na ang sulod niini tungod kay nagsira man ang mga balay-patigayon tungod niining pandamay nga Covid-19 nga milastar na'g usa ka tuig ug tunga.
Dugang pa, daghang mga estudyante nga wala na maka- graduate sa insaktong tuig tungod kay way klarong klase. Daghan intawon ang naapektuhan halos tanan niining pandemya.
Wala kita'y mahimo samtang nia pa kita niing sakita. Sundon lang nato ang tanang protocols nga gipasunod sa atong gobyerno. Ug labaw sa tanan pagpabakuna mo kay mao kini ang bugtong paagi nga matapus na kining atong giatubang nga problema. Ayaw namo og tuo nga duha lang ka tuig ang atong abuton kon magpabakuna ta. Maayo na lang kay duna pa'y duha ka tuig kaysa matakdan ka karon unya mamatay ka diha-diha dayon. Labaw sa tanan SALIG SA DIYOS.