TUNGOD lagi sa pandemiya, hasta ang atong pag-adto sa simbahan naapektohan pud. Kung moadto sab sa simbahan, didto na lang tawon sa guwa kay limitado ang lingkuranan sa sulod. Hasta ang pari wa nay kauban sa altar.
Kaniadto napuno ang altar sa mga altar boys, ministro ug uban pa apan karon ang pari na lang tawon ang nagtikawtikaw.
Siyay kuha sa kopa, siyay yabo sa bino, mohugas sa kamot Ug molimpyo sa tanan niyang gamit sa iyang talad pangseremonyas.
Hasta sab ang kantora mora'g usa na lang ang nag-solo. Siya ang nagtugtog sa keyboard Ug siya sab ang nikanta. Mingaw sab ang paghatag og hostiya kay di na mosulti ang pari o ang tighatag. Lahi gyud sa una nga sadya ang pagsimba.
Hinuon wala may kausaban sa seremonya. Gani para kanako, nahimo nang mas sagrado ug mas mahuloganon ang misa ug liturhiya.
Niadtong Dominggo gibasa ang ebanghelyo gikan sa basahon ni Marcos diin gisugid niini ang pagkamaayong pastol nga nahimong ehemplo sa "servant leader" mao si Jesus.
Gani nahimo pa siyang "redeemer" o mangluluwas sa sala sa kalibutan pinaagi sa pagkamatay niya sa krus. Apan ang mensahe takdo usab sa atong tagsa-tagsa ka kinabuhi. Gitawag kita nga mahimong maayong pastol o magbalantay sa atong mga anak.
Ang mga lolo ug lola ngadto sa ilang mga apo. Mga magtutudlo ngadto sa ilang mga estudyante. Mga tag-iya sa patigayon ngadto sa ilang mga trabahante. Mga opisyales sa gobyerno ngadto sa katawhang ilang giserbisyohan.
Takdo sab ang mensahe ngadto sa mga politiko nga gustong magpapili sa umaabot nga bugnong lugaynon sa Mayo 2022. Gihagit sila tungod kay sa ilang mga kamot magdepende ang kalamboan o kaparutan sa atong nasud.
Kasagaran makalimtan sa mga politiko nga gibutang sila sa puwesto aron mahimong pastol nga moserbisyo sa iyang mga karnero. Apan sa kaulahian mora'g nabutang siya aron magpahimulos sa gahum, magpasilbi imbis siya ang moserbisyo, magpadato gikan sa kaban sa gobyerno, dili na moluwat sa iyang katungdanan, nahimo nang mangtas imbis nga dapat mapahiubsanon kay pinili sila sa katawhan.
Niadtong Hulyo 17 nagpulong ang National Assembly sa PDP-Laban nga pinakadakong partidong politikal sa nasud. Niapil sa panagtapok si Presidente Rody Duterte nga maoy chairperson sa partido. Siya ang labaw'ng pastol sa PDP-Laban busa may obligasyon siyang mogiya ug modisiplina sa mga karnero nga nitipas gikan sa panon.
Iyang gikastigo sila si Senador Koko Pimentel ug Manny Pacquiao kay giuna kuno niini ang ilang kaugalingong interes imbis nga interes sa tibuok partido.
Matud pa ni PRody nasipyat daw si Senador Koko sa basta-basta lang paghatag sa pagka-presidente sa partido ni Senador Manny nga walay bendisyon sa National Council o National Assembly sa partido.
Mora la'g kiko si Senador Manny kay wa daw kini saktong kinaadman nga makasabot sa kasaysayan ug polisiya sa PDP ug sa politika nga iyang gisudlan.
Gani gitawag pa niya nga "punch drunk" o nahubog sa sukmag ang senador kay di na niini mahibal-an ang sakto o dautan sa iyang gibuhat o gipamulong. Mao na ni bai!