COTABATO CITY -- Patay ang usa ka terorista, samtang laing duha ang nadakpan atol sa binakbakay nga nahitabo tali sa Joint Task Force Central ug Bangsamoro Islamic Freedom Fighters (BIFF) sa Dawlah Islamiyah alas 8:15 sa buntag, Dominggo, Hulyo 18, sa probinsiya sa Maguindanao.
Napatay naila nga si alyas Tong Bomber, bomb expert sa grupo, samtang nadakpan sila Nondo Sangalan ug igsuon niini nga si Tong.
Gibutyag ni 1st Mechanized Brigade Commander Colonel Pedro Balisi nga nahitabo ang binakbakay samtang nagpahigayon og law enforcement operation ang Joint Task Force Central sa gitaguan sa mga terorista didto sa Barangay Nabundas, Shariff Saydona Mustapha, Maguindanao Province.
Sumala pa nga pasulod pa lang ang mga sundalo sa ilang target, gipaarakan na sila sa mga terorista, hinungdan nga napugos sa pagbalos ang JTFC, hinungdan sa pagkapatay ni alyas Tong Bomber ug pagkasikop sa duha sa kauban niini.
Narekober sab gikan sa mga suspek ang usa ka M14 rifle, duha ka improvised explosive device (IED), mga bala ug magazines.
Padayon ang paglutos sa JTFC sa mga terorista nga nagtago-tago sa hilit nga dapit sa nahisgutang probinsiya. (Edgar E. Fuerzas)