NAGMINGHOY sa selda sa Baguio Police Station sa Davao City Police ang upat ka mga lalaki nga nagpatari og manok.
Sikop ang upat sa Anti-Illegal Gambling Task Force sa Baguio police nga gipangunahan sa hepe nga si Major Achilles Bargio atol sa ronda nga gihimo sa Barangay Malagos, Baguio District, Davao City alas 11:20 sa buntag niadtong Dominggo, Hulyo 18, 2021.
Sumala ni Major Bargio, nakadawat sila og impormasyon labot sa pagpatari og manok sa mga nahisgutan diin wala na napatuman ang physical distancing.
Usa ka 68-anyos ang edaran sa upat samtang 32-anyos ang batan-on, pulos nagpuyo sa dapit.
Nakuha gikan sa posisyon sa mga dinakpan ang duha ka bihag, ug dunay unom ka mga buhi nga sunoy ingon man ang ilang pusta nga P300.
Kasong pagsupak sa Presidential Decree 602 ug Republic Act 11332 ang ipasaka nga kaso sa mga dinakpan didto sa korte. (Jeepy P. Compio)