GIDALA na sa usa ka lokal nga punerarya sa Davao City ang patay'ng lawas sa lalaki nga napalgan sa Davao River kagahapon sa buntag, Hulyo 19.
Nakurat ang mga molupyo sa Gravahan ug sa Bryco sa Barangay 5-A, Bankerohan dihang nakita ang patay nga lawas sa lalaki nga naglutaw kilid sa sapa.
Dihang na-post sa Facebook ang maong hitabo, daghan ang miingon nga basin og hubog ang maong lalaki ug nahulog sa sapa dayon nalumos.
Naa sab nagsulti sa mga komento nga ilang nakita ang biktima nga milukso sa sapa kinsa mihilak pa ug miingon, "nganong gibulagan ko nimo."
Apan, bisan pa man sa mga komento, wala gihapon kini gituohan sa kapulisan, inay naghimo pa sila og lawom nga imbestigasyon sa hitabo basin unya dunay foul play.
Sukad sa pagsulat ning balita Lunes sa udto, wala pa'y moila o bisan usa ka kabanay nga mipatim-aw sa punerarya sa Angel.
Ang biktima usa ka lalaki, anaa sa 30-40 ang pangedaron, husto ang pamarog sa lawas, nakapantalon og itom ug naka-long-sleeve shirt.
Ginasubay pa sa kapulisan unsay hinungdan sa kamatayon sa biktima. (Jeepy P. Compio)