Nalipay ang mga tigsuporta ni Presidente Rodrigo Duterte ug Mayor Inday Sara Duterte-Carpio nga na-knockout na si Sen. Manny Pacquiao. Napalagpot na man kintahay ang Pacman ug nailisdan ni Secretary Alfonso Cusi Jr.
Gikinahanglan man gud nga mawala si Pacquiao sa mapa sa politika labi na sa molansar pagka presidente. Matunga man gud ang boto sa taga Mindanao. Bisan pag ibutang nato nga modaog si Inday Sara batok ni Pacquiao sa Mindanao, dakodako gyud ang mapahak niini.
Kon itandi sab nato ang ilang mga background story, si Inday Sara gikan sa usa ka pamilyang politiko na daan. Ang iyang pagka kabus ug simple kintahay resulta sa PR sa iyang amahan. Si Pacquiao kay tinuod from “rags to riches” nga resulta sa iyang pagka maayong laki sa boksing.
Tungod niini, importante nga matangtang si Pacquiao gikan sa PDP-Laban.
Kining pagsalmot nilang Sen. Bong Go ug pagdagan og bise presidente ni Digong dugang duwa-duwa na lang kana aron dunay lain-laing katarungan ang pagtangtang.
Nakahibawo na man kita nga si Senador Go ang paglaum sa mga tiguwang nga mga sakop sa opisyal nga pamilya ni Digong diha sa Malakanyang kay di man sila madawat ni Inday Sara. Nakahibawo sila nga dihang motungtong kini sa poder, si Inday Sara magdala og iyang mga tawo. Sama ra kini sa nahitabo dihang nahimo siyang mayor.
Tungod niini, mahinungdanon gyud nga mawala isip seryuso nga contender batok ni Inday Sara ang senador.
Apan tinuod ba gyud nga na-knockout ang Pacman? O igo lang kining nihupo kay nag-andam pa sa iyang bugno batok sa kampyon nga si Errol Spence Jr?
Angay na bang magsaulog ang kampo sa mga Duterte o angayan silang motago og langub aron di maapektahan sa giandam nga nuclear bomb sa kampo ni Pacquiao?
Sa akong nahibaw-an, nabuhi ang mga sentimento sa mga orihinal nga PDP kaniadtong 1982 nga giorganisa ni anhing Nene Pimentel batok sa diktadurya ni Marcos. Sa ngadto-ngadto, nakighiusa sa Laban nga giorganisa nilang Ninoy Aquino diha sa Luzon. (DM nako sa @anol_cebu)