Sipa ug makabungog ang pakpak sa mga sakop sa PDP-Laban ubos sa pundok ni Energy Secretary Alfonso Cusi sa dihang way lipod-lipod nga gianunsyo ni Presidente Duterte atol sa ilang asembliya niadtong Sabado (Hulyo 17), nga modagan siya pagka bise presidente sa piliay sa Mayo 9, 2022.
Ang yano nga katuyoan ni Presidente Duterte, nga modagan pagka bise presidente, mao ang paglikay sa mga kiha unya kon mawala siya sa Malakanyang tungod kay dili man makiha ang presidente ug bise-presidente samtang naa pa sa poder. Iyang gitumbok ang iyang mga kritiko nga sila si kanhi Senador Antonio Trillanes ug kanhi SC Justice Antonio Carpio, nga nagsige og hulga nga siya ikiha.
Sa ato pa, angay nga pasalamatan sa pundok ni Secretary Cusi ang mga kritiko ni Presidente Duterte, nga maoy nakapa-aghat kaniya nga modagan pagka bise presidente ug dili tungod sa awhag sa iyang pundok, nga padaganon siya pagka bise presidente. Sa miagi, kusganon nga gi-endorso sa grupo ni Cusi ang kandidatora ni Presidente Duterte pagka bise ug ni Senador Bong Go pagka presidente.
Apan sa maong asembliya niadtong Sabado, wala maghisgot ang pundok ni Cusi nga si Senador Bong Go ang ilang kandidato pagka presidente. Ang nahitabo, gipalagpot si Senador Manny Pacquiao, presidente sa PDP-Laban, ug ilang gipili si Secretary Cusi, nga presidente sa partido. Apan, duna ba diay lain nga angayan magpresidente sa PDP-Laban gawas ni Cusi?
Karon, misamot og kagubot ang PDP-Laban kay ang pundok ni Senador Koko Pimentel, anak ni anhing Senador Nene, nga maoy nagpundar sa PDP-Laban, dili moila sa gibuhat nga asembliya sa pundok ni Cusi niadtong Hulyo 16-17 sa Clark. Gibirahan ni Presidente Duterte si Senador Koko nga ang PDP-Laban kaniadto “father and son” ra nga partido. Ang punto ni Presidente Duterte nga misikat ang PDP-Laban tungod kaniya.
Ang dakong pangutana, kinsa man gyud ang kandidato pagka presidente sa PDP-Laban ni Cusi? Mao ni ang isyu nga gibungat ni Senador Koko Pimentel kay nagduda siya nga ang suportahan sa pundok ni Cusi pagka presidente mao si Davao city Mayor Sara Duterte-Carpio, anak sa Presidente. Matod ni Senador Koko supak sa Batakang Balaod sa PDP-Laban, nga ang suportahan nga kandidato dili sakop.
Si Mayor Sara mideklarar na nga modagan pagka presidente bisan pa sa pagdumili sa iyang amahan. Modagan siya ubos sa iyang partido Hugpong ng Pagbabago (HnP). Sa akong nahibaw-an, wa man gidili sa Comelec ang kowalesyon sa mga partido sa pulitika. Dili layo ang posibilidad nga magkowalesyon ang HnP ug PDP-Laban ni Cusi aron ang ilang kandidata pagka presidente mao si Mayor Sara Duterte. Gani, gisulti ni Sara nga iyang HnP makigkowalesyon sa uban nga partido.
Husto diay ang akong pangagpas sa akong lindog sa miagi nga Miyerkoles nga ang nga mag-atbang sa piliay pagka presidente ug bise-presidente mao ang panagpares ni Senador Ping Lacson ug Senate President Tito Sotto batok sa Duterte-Duterte tandem. Apan maklaro ni sa Oktubre kon kinsa gyud ang moduso sa certifico de candidatora.