Ang lokal nga kagamhanan sa Lungsod sa Consolacion, Cebu ubos ni Mayor Joannes “Joyjoy” Alegado nagplano nga magtukod og 230 nga hektaryas nga reclamation project sa Barangay Tayud. Ang barangay maoy nahimutangan sa shipyard o baradiruhan nga gidumala og daghang kompaniya. Dugay na ang shipyards sa lugar. Nakahatag kini og trabaho sa daghang mga lumolupyo sa lugar ug nakatampo og dako sa panudlanan sa lungsod pinaagi sa buhis. Ang mga lomolopyo sa barangay nga mga kabus nagsalig lang usab sa ilang panginabuhian sa pagpangisda. Maong ilang kusganong gisupak ang proyekto.
Ugmaron kini pinaagi sa public-private partnership ubos sa ngalan nga La Consolacion Seaport Development Corporation. Tawgon kini og Seaport Reclamation Project. Usa kini ka mixed-use development nga tukuran og commercial complex ug tourism port facilities. Daghang mga patigayon ang ibutang sa kon mahuman na kini. Giingong makapalambo kini sa lungsod.
Tinuod kaha nga makapalambo kini sa lungsod? O ba kaha makapalambo lang sa panudlanan sa mga nagpasiugda niini? Gikinahanglan ba ang reclamation sa lungsod? Wa na bay lain lugar ang lungsod nga ilang magamit sa pagpalambo sa ilang ekonomiya? Dako pa man siguro og lugar ang lungsod.
Kon matukod ang reclamation, daghan ang maapektuhan, sama sa shipyards ug mga lumolupyo. Way plano ang kagamhanan ni Alegado kon asa i-relocate ang maapektuhang mga lumolupyo. Ang mga shipyard owners gitagalan na og usa ka tuig, wala na gi-renew ang ilang business permits hinungdan nga midangop sila sa korte. Giingnan lang silang Alegado nga mobalhin og laing lugar. Pila ka mga tawo o trabahante ang maapektuhan kon manira ang shipyards? Ingon lang ana kasayon?
Matod sa mga expert, ang reclamation adunay mga bentaha ug disbentaha. Makadaut kini sa kalikupan ug maoy hinungdan sa mga baha ug lunop sa mga ubos nga lugar kay dili naman natural ang agus o dagan sa tubig dagat. Makadaut usab sa marine lives. Unya siguro kaha nga adunay mobubo og puhunan. Tan-awa ang South Road Properties (SRP) sa Cebu City nga “white elephant” sa dugay nga panahon gihapon kay way namalit nga investors.
(bobbygnalzaro@gmail.com)