Nabalaka na ang Cebu City Police Office (CCPO) sa sunodsunod nga mga pagpamusil sa Dakbayan sa Sugbo. Sulod lang sa duha ka mga semana, siyam ka mga tawo na ang gipamatay, labing uwahi mao ang usa ka inahan nga duha ka mga semana lang ang nakalabay sa iyang paggawas sa bilanggoan tungod sa illegal drugs.
Bitaw, nahitabo ni samtang naa pa ang coronavirus pandemic ug ubos pa sa modified general community quarantine (MGCQ) ang dakbayan sa Sugbo. Nagplano ang CCPO nga hugtan ang mga pagpatrolya sa kadalanan aron magpanagana ang mga kriminal.
Di lang tingali ang pagsanta ang tutokan, kon di pagsulbad sa tanang mga pagpamatay. Kasagaran sa mga pagpamusil wa masulbad sa kapulisan. Ngano? Kuwang og kooperasyon ang publiko. Ngano? Tungod sa kakuwang sa pagsalig sa kapulisan ug kahadlok nga balikan sila sa mga kriminal. Sa ilang huna-huna, di sila mapanalipdan sa kapulisan gikan sa mga pagpaminawos.
Dugay na kaayo ni nga dagan sa panghuna-huna sa kinabag-an sa publiko. Sukad pa ni kaniadto. Bisan og naa sa iyang atubangan nahitabo ang krimen, ingon sila sa buta ug bungol.
Bisan pa sa paninguha sa kapulisan nga molimpyo ang ilang imahe, di gihapon kini makatangtang sa kakuwang sa pagsalig kanila sa katawhan.
Tan-awa lang gud, sa nakalabay nga upat ka mga tuig, pila man ka high-profile nga mga tawo, lokal nga opisyal ug opisyal sa kapulisan nga gipamatay? Bisan sa ilang estado, ang dagan sa imbestigasyon way gipadulngan. Lawa-lawaan ug agup-upon na lang ang record sa krimen, magpabilin kining di masulbad. Hinunoa, labina kon nalambigit sa illegal drugs ang gipatay, pulis pa maoy dudahan.
Hangtod nga alang sa ordinaryong mga tawo di makakita sa pagkasulbad sa sobra sa katunga sa mga krimen, labina sa pagpatay, ang way puas nga mga pagpatay karon di masumpo kay way mosaksi kay kuwang gihapon og pagsalig ang katawhan.