Adunay person of interest ang Mambaling Police Station sa pagpusil sa usa ka babaye nga bag-ong makagawas sa prisuhan tungod sa kasong illegal nga drugas niadtong Biyernes sa gabii, Hulyo 16, sa Sitio Puntod, Barangay Mambaling, Siyudad sa Sugbo.
Matod ni Police Lieutenant Colonel Wilbert Parilla, deputy director for operation sa Cebu City Police Office (CCPO), ang biktima nga si Flora Mae Yuson, 32, nalambigit kaniadto sa illegal nga druga nga hinungdan nga nabilango apan nakabenepisyo kini sa plea bargaining agreement hinungdan nga nakagawas.
Samtang, drugas gihapon ang gitan-aw nga motibo sa pagpamusil ug giila ang person of interest nalambigit usab sa illegal nga drugas.
Sa impormasyon nga nakuha sa kapulisan nga ang tuyo sa suspek mao ang bana ni Yuson nga kanhi tanod sa maong barangay apan nalambigit sa drugas.
Apan matod pa, nisibat na human gipangita sa mga durugista tungod sa dakong utang niini kanila.
Giangkon ni Parilla nga atol gipatawag nga command conference matag Lunes ni Police Colonel Josefino Ligan nga gipatutukan sa iyang mga chief of police ang sunodsunod nga pusil sa dakbayan nga miabot nag 12 ka kaso sulod lang sa Hulyo.
Kasagaran sa maong mga pagpamusil adunay kalambigitan sa illegal nga drugas.
Dugang ni Parilla, gipanghipos sa mga durugista kadtong mga kanhi police informant tungod sa pagtuo nga sila pa gihapon ang nagpahibawo sa mga pulis sa mga tawo nga padayon nga namaligya sa illegal nga drugas.
Sulod lang sa 19 ka adlaw, nakatala na sila og 79 ka anti-drug operations diin daghan sa drug pushers ang nangadakpan.
Samtang nadakpan na usab sa buy-bust ang nagpusil-patay kang Jenrey Sanico sa dalan A. Soriano, Barangay Carreta, siyudad sa Sugbo.
Ang nadakpan mao si Noeh Niez nga taga Ponce 1 sa Barangay Carreta nga naila nga notadong tulisan.
Tulis ang gitan-aw nga motibo sa pagpamusil human makita sa mga saksi sa cellular phone niini.
Hugot nga gihimakak ni Niez nga siya ang nagpatay kang Sanico. (AYB)