Ex-con nga drayber og taxi gipatay

GIRAKRAKAN: Bisan way pasahero, nganong niabot sa sudlonong dapit sa Compostela? Kuwestiyon sa kapulisan sa girakrakan-patay nga taxi driver nga si Antonio Taneo 51. / Gikan sa kapulisan sa Compostela
GIRAKRAKAN: Bisan way pasahero, nganong niabot sa sudlonong dapit sa Compostela? Kuwestiyon sa kapulisan sa girakrakan-patay nga taxi driver nga si Antonio Taneo 51. / Gikan sa kapulisan sa Compostela

Usa ka ex-convict nga taxi driver patay human girakrakan sa riding in tandem sa Barangay Canamucan, lungsod sa Compostela kagahapon sa alas 9:00 sa buntag, Hulyo 19.

Ang biktima mao si Antonio Taneo, 51, minyo ug taga Sitio Timpolok, Barangay Babag, dakbayan sa Lapulapu, nagmaniho siya sa KATS Taxi GAC-8918.

Ang kapulisan nanakuha og impormasyon nga si Taneo nabilango sa Lapulapu City Jail niadtong 2018 human sa nasikop sa buy-bust sa gidiling drugas.

Nakagawas ug nadakpan pagbalik sa samang kaso sa tuig 2020. Nagawas gihapon human ni-avail sa probation.

Si Patrolman John Mark Perez sa Compostela Police Station nga nahinabi sa Superbalita Cebu nagkanayon nga ang biktima dunay gianha sa maong dapit sayo sa buntag.

Ang dapit sudlonon paingon sa dagat mga 50 metros ang gilay-on gikan sa national highway. Dihang naabot ang biktima, nagpaabot nang daan ang motorsiklo nga dunay duha ka mga tawo nga nasakay nga nagkawo ug naka-face mask.

Ang angkas mikanaog girakrakan ng biktima. Wala makakontento, giablihan ang driver side nga purtahan ug gitiwasan sa pagpusil sa ulo og kawasan.

Misibat ang mga suspek wala na masuta sa nakasaksi kung asa mipadulong.

Narekuber sa crime scene ang lima ka kabhang sa bala sa kalibre .45.

Si Lt. Samuel Negro, hepe sa Compostela Police Station, nagkanayon nga wala nila isalikway ang posibilidad nga gi-unay sa mga kauban sa illegal nga kalihukan sag biktima.

"Kaila niya ang mga mamumuno human niabot sa walay pasahero...” dugang ni Negro.

Gipadayag niini nga dili mawagtang ang ilang pagduda nga dunay illegal nga transaksiyon ang biktima.

Gawas niini, gitan-aw nila sa imbestigasyon nga posible nga dunay bulilyaso ng biktima sa illegal nga negosyo.

LAPU-LAPU

Samtang, gipusil sa wala mailhing mamumuno ang usa ka 39-anyos nga lalake sa Purok Kulo, Barangay Canjulao, dakbayan sa Lapu-Lapu, alas 7:00 sa buntag kagahapon, Hulyo 19.

Ang biktima nga nailhang si Ryan Bering Dungog, kinsa naglakaw sa dapit nahitaboan dihang adunay duha ka lalakeng luwan sa motorsiklo ang nipusil kaniya.

Dali ra usab nga misiba ang mga mamumuno samtang si Dungog dali usab nga gidala sa tambalanan diin siya nagpaalim sa pagkakaron.

Matod ni Police Staff Master Sergeant Mer Acebron,, desk officer sa Police Station 3 sa Lapu-Lapu City Police Office (LCPO), nga padayon pa nila karong gisusi ang backround sa biktima aron makaestablisar sa motibo sa pagpamusil.

Sa inisyal nilang pakisusi, walay record sa ilang buhatan ang biktima.

Hinabion pa usab nila ang kabanay sa biktima kung wala bay gikabangi si Dungog.

Tan-awon usab sa kapulisan ang dapit nahitaboan kung duna ba kini mga CCTV nga posibleng nakita ang krimen. (GPL, GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph