SECTIONS
Superbalita Cebu
Tuesday, September 21, 2021
SUPERBALITA CEBU

5,827 sa Mandaue di kwalipikado sa SAP

Adunay 5,827 ka beneficiaries gikan sa Mandaue City nga di angay makadawat, apan naapil sa Social Amelioration Program (SAP) nga sa kinatibuk-an nakadawat og P34.962 million, matod sa Commission on Audit (COA).

Sa COA report sa 2020, ang Dakbayan sa Mandaue nakadawat og P334,650,000 gikan sa Department of Social Welfare and Development (DSWD) ubos sa SAP niadtong Abril 14, 2020 aron i-apod apod sa ilang mga konstituwente.

Apan, sa pag-review sa COA, ilang nakita nga adunay 5,827 ka benepisyaryo ang lakip sa List of Ineligible Beneficiaries” sa DSWD atol sa post-validation sa first tranche.

Ang mga benepisyaryo gikan sa Barangay Alang-Alang (308), Bakilid (116), Banilad (192), Basak (346), Cabancalan (267), Cambaro (87), Canduman (199), Casili (125), Casuntingan (236), Centro (119), Cubacub (158), Guizo (382), Ibabao-Estancia (54), Jagobiao (296), Labogon (372), Looc (103), Maguikay (174), Mantuyong (36), Opao (96), Pagsabungan (231), Paknaan (342), Subangdaku (144), Tabok (198), Tawason (205), Tingub (117), Tipolo (240) ug Umapad (648).

Ang kinatibuk-ang kantidad nga nahatag sa dili kwalipikado nga mga benepisyaryo mokabat og P34,962,000.

DSWD TIGSUSI

Sa pakighinabi sa Superbalita Cebu ni Mandaue City Administrator Jamaal James Calipayan, siya niingon nga adunay di kwalipikado nga beneficiaries ang miuli sab sa ilang mga nadawat.

Sa pagpamatuod, gibutyag sa COA nga dul-an sa P3,402,000 ang gibalik sa 567 nga dili kwalipikado nga beneficiary ug giuli na ngadto sa DSWD.

Sa pagpangandam sa pagpanghatag sa first tranche, si Calipayan miingon nga naglibog sila sa mga kwalipikasyon nga ipatuman tungod sa lain-laing advisories sa kwalipikasyon.

Matod ni Calipayan nga giingnan sila sa DSWD nga dili maguol tungod kay aduna ra silay ibutang nga validators sa kada barangay nga mopamatuod kon ang indibidwal nakapasar sa ilang kwalipikasyon o wala.

Sigon niya nga ang mga DSWD validator ang adunay katungod nga moila kon kinsa ang kwalipikado.

Girekomendar sa COA nga magpahigayon og imbestigasyon sa pag-apod apod sa mga dili kwalipikado nga pamilya sa SAP.

Apan matod ni Calipayan nga ang Department of the Interior and Local Government (DILG) naghimo na og imbestigasyon bahin niini human naapud-apod ang una nga tranche.

Wa na silay nakit-an nga dili kwalipikado nga mga benepisyaryo alang sa second ug third tranche.

Sigon ni Calipayan nga dili kini pasabot nga kwalipikado sa una nga tranche dili mahimong kwalipikado alang sa sunod nga tranche.

Gani, giaprobahan kini sa DSWD validators kay kon ugaling dili kwalipikado ang beneficiary, dili kini hatagan sa DSWD.

Mirekomenda sab ang COA sa Dakbayan nga ang ipauli sa tanang nakadawat nga dili kwalipikado ang ilang nadawat.

Niini, miingon si Calipayan nga buhaton kini nila kon mopagawas ang COA og mandato nga gukdon nila kadtong mga nakadawat sa SAP nga dili unta angay.

Matod ni Calipayan nga tungod kay giapod-apod kini sa miaging tuig, nahurot na kini og gasto sa mga nakadawat nga dili kwalipikado.

Apan, kon adunay buot nga mouli sa ilang nadawat, niingon si Calipayan nga modawat pa gihapon sila og ila dayong iuli sa DSWD.

Ang matag SAP beneficiary makadawat og P6,000 kada tranche.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph