Equipment operator nadaro sa trak, patay diha-diha

NAKADASMAG: Mao kini ang dumptruck nga giingong nawad-an og brake nga nakadasmag kang Mario La­zar­te Genobia, 53. Si Manuel Laguna, drayber sa dumptruck, pasakaan og kaso sa pamilya ni Genobia. / ROGER E. VALLENA
NAKADASMAG: Mao kini ang dumptruck nga giingong nawad-an og brake nga nakadasmag kang Mario La­zar­te Genobia, 53. Si Manuel Laguna, drayber sa dumptruck, pasakaan og kaso sa pamilya ni Genobia. / ROGER E. VALLENA

Patay diha-diha ang usa ka heavy equipment operator human mabanggai sa usa ka dump truck nga nawagtangan og brake ug naguroy pag mga 100 ka metro sa Lunes sa gabii, Hulyo 19, 2021 sa A. Miñoza St., Sityo Lower, Barangay Bacayan, siyudad sa Sugbo.

Driver gidakop usab dayon sa kapulisan Talamban Police Station human sa aksidente ug pasakaan og kasong reckless imprudence resulting to homicide and damage to property.

Ang biktima giila nga si Mario Lazarte Genobia, 53, taga sitio Aroma, Barangay Pulangbato, Siyudad sa Sugbo. Si Genobia padung mopalit og tambal sa iyang apo.

Nadakpan ug gitanggong si Manuel Udtuhan Laguna, 39, driver sa dump truck (GAD 7478) nga gipanag iya sa Trash Truck Transport Limited nga nagbase sa Siyudad sa Lapu-Lapu.

Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO) nga parehong nagsubay sa dalan A. Miñoza ang dump truck ug motorsiklo, apan sa dihang ni-brake na unta si Laguna, giingong ni-malfunction kini.

Nadasmagan si Genobia ug naguyod pa og mga 100 ka metros.

Nadumbol pa ang dumptruck sa Nissan Urvan nga gimaneho ni Joefel Cabreros, 39, taga sitio Sta. Cruz, Barangay Cabelen, lungsod sa Liloan.

“Kaning traffic accident kining suspect nato nga ang iyang gidrayban ani is dump truck unya heading towards Talamban. While travelling, nawad-an siyag brake mao nang nawad-an siyag control sa sakyanan. And then first niya nga nabanggaan kining namatay nga nag drive og motor, nalatayan niya ang nag motor nya after nalatayan, nidiretso pa gyud ang iyang gi drayban nga dump truck mao nang naigo na sad to niya ang usa,” matod ni Parilla.

Si Major Alvin Llamedo, hepe sa Talamban Police Station nga nahinabi sa Superbalita Cebu, nagkanayon nga ang dump truck kusog ang dagan.

Nagkarga kinig mga graba dihang nawad-an og brake tungod sa kabug-at base sa report sa iyang traffic investigator.

Iyang nadasmagan si Genobia nga naguroy og mga 100 meters una pa nidasmag sa Nissan Urvan.

Si Llamedo niingon nga apeke usab ang karsada kay two-lane ra kini.

Matod ni Llamedo nga ang pamilya ni Genobia mopasaka gyud og kaso batok kang Laguna. (AYB, GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph