USA ka gatus ka adlaw na ni Pastor Luis B. Moran sa iyang pag-alagad isip bag-o nga pangulo (head) sa Office for Senior Citizens Affairs (OSCA) dinhi sa Davao City niadtong Hulyo 9, 2021.
Sukad sa iyang paglingkod sa maong buhatan, daghan na siya og gihan-ay nga mga programa ug proyekto alang sa kaayohan sa mga senior citizens sa siyudad.
Sa iyang mensahe, gipasalamatan niya si Davao City Mayor Sara Duterte-Carpio, kinsa misalig sa iyang katakus, ug si Mrs. Azucena T. Bajao, kinsa kanhi OSCA head nga nakauban niya sulod sa taas nga panahon.
Si Pastor Moran di na bag-o alang nako sanglit nakauban nako siya sa opisina ni kanhi Davao City First District Councilor Leo "Happy L.A." Avila III sukad niadtong Hulyo 1, 2001 hangtud Hunyo 30, 2010.
Siya ang among focal person alang sa mga senior citizens sa siyudad sa Davao.
Kauban namo siya sa pag-organisa sa Elderlympics nga gisalmotan sa liboan ka mga senior citizens sa siyudad matag tuig.
Siya ang among sinaligan sa pag-atiman sa tanang senior citizens nga modangop sa among opisina kaniadto.
Kabahin usab siya sa tanang buluhaton sa pagpanday sa City Ordinance 0417-10 kun Older Person Welfare Code of Davao City.
Tungod sa iyang pasyon ug Diniyos nga pagserbisyo sa mga edaran, wala gyuy problema si Konsehal Avila kung customer satisfaction ang atong hisgutan.
Human nakahukom ako nga mobalik sa print ug media industry, padayon gihapon si Pastor Moran sa pagserbisyo sa mga senior citizens ilawom sa opisina ni Mrs. Bajao sa OSCA.
Isip media practioner, kanunay ako nga mangalap og balita sa ilang buhatan.
Ug niadtong Sabado, Hulyo 17, nahinabi nako si Pastor Moran sa among programa sa dxGO Aksyon Radyo diin niya gisaysay ang mga programa nga ila karong gihan-ay.
Usa sa pinakadakong programa mao ang pagpatungha sa mga edaran nga wa pa nakahuman sa ilang kurso sa kolehiyo pinaagi sa pagbuligay sa Commission on Higher Education (Ched) Davao Region.
Laing buluhaton nga maoy giatiman niya karon ang pagpanday sa Implementing Rules and Regulations (IRR) sa Older Person Welfare Code of Davao City.
Kining IRR maoy labing importante aron hingpit na nga mapatuman ang mga probisyon niini nga ordinansa, busa paspasan nila ang pagtrabaho niini uban sa hintungdan nga nga opisina sa lokal nga kagamhanan.
Daghan pa kaayo siya og mga plano alang sa kaayohan sa mga senior citizens, apan kuwang na ang atong espasyo mao nga dinhi na lang ako kutob ug tugoti ako sa pag-ingon: "Dalaygon ka, Pastor Moran!"