COTABATO CITY -- Padayong gisubay sa Bureau of Fire Protection (BFP) sa siyudad ang nahitabong dakong sunog nga milamoy sa mga stalls sa palengke alas 2:00 sa kaadlawon kagahapon, Martes, Hulyo 20.
Sa taho gikan sa BFP-Cotabato City nasayran nga nakadawat sila og tawag sa telepono sa dakong kalayo nga midilaab sa Mother Barangay Poblacion sa dakbayan.
Abtik nga nagresponde ang mga bombero uban ang Chinese Fire Brigade.
Apan dako na ang kalayo sa Mega Market Area sa diha nga nahiabot ang mga bombero nga nagtinabangay sa pagpawong sa kalayo.
Miabag sab ang ka-bomberohan gikan sa Sultan Kudarat, Maguindanao ug Bangsamoro Government.
Naglisud sab ang BFP sa pagkontrola sa sunog gumikan sa kapiot sa kalsada pasulod sa pikas tampi sa palengke.
Moabot sa 40 ka mga tindahan o stall ang gilamoy sa dakong kalayo ug minilyon ka pesos ang damyos.
Kahinumdoman nga kapila na ka higayon nasunog ang Mega Market area sa siyudad sa niaging panahon. (Edgar E. Fuerzas)