SUPERBALITA CEBU

Diputado: ‘Tablaw pay gahikog’

Cuentas Claras

Daghan ang nagtuo nga si Presidente Rodrigo Roa Duterte (PRRD) maoy labing gamhanang tawo sa Pilipinas karon.

Apan para nako, dili si PRRD ang labing gamhanang tawo sa nasod.

Kinsa man?

Si Health Secretary Francisco Duque III.

Ngano man?

* * *

Sa dihang misulti si PRRD, ug gidasonan pod ni Senate President Tito Sotto, nga di na kinahanglan nga maggamit og face shield basta mag-gamit na og mask kon mogawas sa balay tungod kay way ebidensiya ang dugang proteksiyon nga ikahatag niini gawas sa mga empleyado sa ospital, mitutol si Duque og ang pagtutol ni Duque mao gihapon ang gisunod hangtod karon.

Sa dihang mipagawas og kamandoan ang national IATF nga kadtong bakunado na og 2nd dose di na kinahanglan mopakita og negative swab result kon mobiyahe sa ubang lugar sa Pilipinas, mitutol gihapon si Duque og siya gyod ang natuman. KInahanglan gihapon ipakita ang negative swab result sa mga mobiyahe.

Gamhanan gyod kaayo ni si Duque.

* * *

Natangtang gyod si Pacman sa PDP-Laban human sa gihimo nga national assembly kaniadtong Hulyo 17, diin mismo si PRRD ang mi-preside.

Apil nga nakuhaan og pako si Senador Koko Pimentel sanglit gisalindot man usab siya sa maong panagtapok.

Apan mibarog ang grupo ni Pimentel nga supak sa balaod ang maong kalihokan og nagpabilin sila sa PDP-Laban.

Buot ipasabot, duha na ka grupo ang PDP-Laban karon. Kinsa may tinuod nga PDP-Laban ani karon?

Bugtong ang Comelec lang ang makahukom niini.

Kon moabot ang maong isyo sa Comelc, kinsa kaha ang mogawas nga mananaog?

Di pa matagna apan segurado gayod nga bukikion sa Comelec ang constitution and by-laws sa PDP-Laban aron masubad ang mga isyu.

* * *

Daghan ang naglibog.

Molansad kuno si Davao City Mayor Sara Duterte-Carpio pagka-presidente.

Molansad sab kuno si Senador Bong Go sanglit siya man ang gituboy sa grupo ni Al Cusi sa PDP-Laban.

Mahitabo kaha nga magkontra silang duha?

Matod pa ni Senador Bong Go, di siya makigkontra sa mga Duterte, apil na si Mayor Sara.

Nagpasabot ba kini nga di na lang modayon si SBG og iya na lang suportahan si Mayor Sara?

Posible ba kaha nga si Mayor Sara ang modagan pagka-presidente ug si SBG pod ang modagan pagka-bise president?

Hmmm... mao kini hunghong sa usa ka amigo kaniadtong Dominggo. Pagsulti ni PRRD nga modagan na lang siya pagka-bise presidente, kinsa pa may gusto mokontra niya sa maong posisyon? Kon duna man gani, tablaw pay gahikog.

Kon way modagan, hayahay ang iyang ibutang sa maong posisyon nga sinaligan na niya sud sa dugay na nga panahon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!