Hagit sa katakos ni Davao City Mayor Inday Sarah Duterte-Carpio ang pagsulbad sa kamatayon sa magtiayong Atty. Hilda Sapie ug Mohammad.
Dako pa kining insulto ni Sarah kay nailhan ang ilang lugar nga malinawon ug hadlukan ang katawhan sa paghimog krimen.
Apan unsang pagkabutanga, ang magtiayong broadcasters gipatay sa sniper.
Sa ato pa, dili bastabasta ug dili ordinaryo ang mamumuno nga naghimo sa krimen nga usa lang ka bala ang pagkaigo sa mga biktima.
Subo palandungon ang gi-report sa kapulisan nga pabilin silang blanko kon si kinsay suspek nga naghimo sa krimen.
Samtang giwitkan ni Manila City Mayor Isko Moreno ang pagsige og laag ni Sarah sa nagkadaiyang lugar sa Pilipinas isip pangandam sa pagdagan sa pagka presidente.
MAYOR LABELLA
Di man lalim ug stressful sab kaayo ang trabaho ni Cebu City Mayor Edgardo Labella ilabi na taliwa sa pandemiya.
Mao gikinahanglan sab ang pagpahuway ni Labella kay mibalik man sab ang iyang pag ubo-ubo ug misaka sab pagbalik ang kaso sa Covid-19.
Si Labella ug ang Cebu City bag-o lang nakadawat og labing nga grado sa Annual Audit Report sa Commission on Audit (COA) nga unmodified.
DERAMA
Daghan sa mga pulitiko ang nagpabakona aron makita sa katawhan nga ang ilang mayor, bise mayor, kongresista ug kapitan nagpabakona.
Kini maoy gihimo ni Boljoon Cebu Mayor Merlou Derama ang pagpabakona atubangan sa katawhan.
Sa interview sa Agila, namahayag si Derama, dako kaayo og epekto ang iyang pagpa bakuna ug misunod ang mga tawo
Matud ni Derama, isip amahan sa lungsod, iyang gipakita sa mga molupyo luwas ang magpa bakona.
Niadtong una niingon si Derama nga daghan sa mga tawo nahadlok magpabakona kay dunay mga di maayong tabitabi
Si Derama, naa na sa katapusang termino sa pagka mayor sa Boljoon, nidugang nga iyang gipahibawo ang katawhan nga maayo ang gipamati sa iyang lawas human nabakunahan mao daghan ang nadasig. (Email: efrenlonzon71@gmail.com / Text: 09235562777)