Sa sunod tuig 2022, moumento ang Internal Revenue Allotment (IRA) o bahin sa nasudnong kita alang sa 82 ka mga lalawigan, 146 ka mga dakbayan, 1,488 ka mga lungsod ug 42,046 ka barangay sa nasod. Maayo ang tumong niini aron paghatag og mas igong gahom sa mga lokal nga kagamhanan sa pagpatuman og mga proyekto nga gikimahanglan sa dapit.
Apan dili lang kaha kini laing tinubdan sa kurapsiyon?
Ang gahin sa matag LGU managlahi. Magdepende kini nga buhis nga naamot ngadto sa nasudnong panudlanan matag tuig ug lakip usab sa konsiderasyon ang populasyon ug kadak-on sa dapit. Moumento kini tungod sa hukom sa Korte Suprema niadtong 2019 nga napabor sa petisyon ni Batangas Governor Hermilando Mandanas.
Sumala ni Mandanas, ang kwentada sa Department of Budget and Management (DBM) sa IRA kinahanglan nga dili lang sa nakolekta nga buhis apan maglakip kini sa ubang kita ug koleksiyon sa kagamhanan gikan sa LGUs sama sa Customs duties.
Si National Anti-Poverty Commission (NAPC) Secretary ug Lead Convenor Noel Felongco, atol sa virtual press conference, niingon nga ang pagpatuman sa Mandanas Ruling mopalambo sa mga programa ug inisyatiba sa LGU sa pagtabang sa mga kabus nga mahaw-as sa kalisod.
Nindot ang tumong kon mapatuman sa insaktong pamaagi.
Sa pikas bahin, ang Mandanas Ruling giisip nga preview o pasiuna sa Pederalismo nga di kinahanglan ang makuti nga pag-usab sa pipila ka seksiyon sa 1987 Constitution.
Sentro sa Pederalismo mao ang ekomikanhong pagbahig, dili lang ang gambalay o istraktura sa pulitika. Ang paningkamot ni Presidente Rodrigo Duterte niini wa makasutoy tungod sa daghang babag labina sa pagtumaw sa pandemiya sa Covid-19.
Ug kon positibong aspeto lang ang tan-awon, way kuwestiyon. Ang Mandanas Ruling makaayo sa LGU. Unsay imong panahom?