Masubhan karong alas 3:00 sa hapon isip sakop sa NorthPort Batang Pier ang higanteng si Greg Slaughter batok sa Phoenix Super LPG Fuel Masters sa pagpadayon sa 2021 sa Philippine Basketball Association (PBA) Philippine Cup sa Ynares Center sa Pasig City.
Sa premirong duwa sa Batang Pier, wala nakapakita og aksyon ang 7-footer nga produkto sa University of the Visayas (UV) Green Lancers kay nalangan ang pagbalik niini sa nasod tungod sa iyang vaccination schedule sa Amerika.
Gumikan kay wala si Slaughter, tataw nga haw-ang ang ilawom nga bahin sa Batang Pier hinungdan nga nabunyagan sila og dakong kapildihan, 53-85, batok sa Meralco Bolts.
Hinuon ning higayuna, gilaumang mausab ang dagan sa duwa sa Batang Pier sa paghiabot ni Slaughter.
Sa ilang bahin, ang Fuel Masters nasubhan sab og kapildihan apan nakahatag sila og saktong kombati una sila ningyukbo batok sa Magnolia Ang Pambansang Manok Hotshots, 80-73.
Sa main game nga ipahigayon sugod karong alas 6:00 sa hapon, magsanka ang Hotshots ug Alaska Aces.
Sama sa Hotshots, ang Aces nasubhan sab og kadaugan diin ilang gipanglampornas ang Blackwater Bossings, 103-77.
Gilauman nga kulbahinam ang panag-engkuwentro sa Hotshots ug Aces.
Sa orihinal nga eskedyul karong adlawa, ang Aces makigsangka unta sa Terrafirma Dyip unya magtagbo ang TNT Tropang Giga ug Hotshots apan nauswag kining maong mga panagparang gumikan sa health and safety protocols sa liga.
Adunay upat ka mga magduduwa sa Tropang Giga nga kinahanglang i-swab og balik kay ang negatibong resulta sa premiro nilang tests kinahanglan pang kompirmahon.
Tungod niini, ipa-swab sab og balik ang ubang mga sakop sa KaTropa.
“Four TNT Tropang Giga players have returned tests that were either positive or need to be confirmed for COVID-19 under government approved league protocols,” opisyal nga pamahayag sa PBA.” (ESL)