Labing seguro, balloons ug confetti ang gipangsab-it na karon sa ibabawng bahin sulod sa Fiserv Forum sa Milwaukee.
Kini aron pag-andam sa selebrasyon sa pagsugat sa gikahinaman nga kampiyonato - ang Larry O’Brien trophy.
Katapusang naangkon sa Bucks ang maong tropeyo niadto pang tuig 1971, sa panahon pa nila ni Kareem Abdul Jabbar ug Oscar Robertson.
Niadtong panahona, kuwatro anyos pa lang ang ilang kasamtangang headcoach nga si Mike Budenholzer ug wala pa mangatawo ang sagad sa ilang players karon.
Apan sa dili pa kini nila maangkon, gikanahanglan una moagi og igong kombati si Giannis Antetokoumnpo ug ang kinatibuk-ang puwersa sa Bucks aron hingpit nilang madispatsar ang Phoenix Suns.
Human mabintahai sa unang duha ka duwa sa series, 0-2, ang Bucks nakakita og solusyon nga makabawos sa dihang sila na pud ang mi-host sa Game Three ug Game Four aron pagtabla sa serya, 2-2.
Pero ang kadaugan sa Bucks sa Game 5 nga nahitabo mismo sa korte sa Suns maoy nahimong dakong istorya series.
Nag-ung-ong na unta sa kadaugan ang Suns sa himatyong mga segundos sa dihang si Devin Booker miatake sa shaded area human nakaipsot sa depensa ni TJ Tucker.
Apan sa wa niya damha, nakasugat siya sa help defense ni Antetokoumnpo ug imbis sa iyang naandan nga pull up jump, iya na lang unta kining gihata alang sa fade away shot.
Pero sa wala pa kini mabuhat, gikawatan siya og bola ni Jrue Holiday alang sa fastbreak play ug ang alley-op ngadto ni Antetokoumnpo maoy naghatag og timaan sa ilang kapildihan.
Usa ka dakong sugal ang gihimo ni Holiday niadtong higayona, kay sa pagtabang niya og depensa ni Booker iya mang nabiyaan si Chris Paul. Apan suwerte kay nahimo kining yawe sa kadaugan.
Duna pa untay kahigayunan nga makabalik og sayo ang bola ngadto sa Suns apan ang offensive rebound ni Antetokoumnpo sa katapusang 9.8 segundos nga nahabilin sa duwa maoy nagtidlom sa ilang paglaom.
Ubos ning maong serya, ang Bucks maoy unang nakadaog sa homecourt sa ilang kontra ug sa samang higayon mao usab ang nagsakmit sa 3-2 nga bintaha.
Sa kasaysayan sa finals, 72 porsiyento sa team nga midaog sa Game 5 human ang series matabla, 2-2, maoy makalangkat sa titulo.
Samtang 82 porsiyento sa team nga makauna og 3-2 sa series mao usab ang makampiyon. Sa ato pa, motangkod lang og 28 o 18 porsiyento ang chance sa Suns nga makahimo og milagro.
Ug kini magdepende sa consistency sa ilang performance - ilabi na ni Paul ug ni Booker.
Epektibo man tuod ang ilang panagpares, apan kon magpirme na man gani anaa kanila ang bola, mas sayon sila nga depensaan.
Mao ni nahitabo sa Game Four ug Five diin dumadaog na unta sila sa himatyong segundos apan napildi gumikan sa depensa.
Unless kon ilang i-involved sa opensa ang kaubanan ug maampingan ang bola, posibling adunay Game 7 nga mahitabo ug adto pa gyud kini sa ilang korte duwaon. We’ll see. (jun.migallen22@gmail.com)