Balay-Balay, Tubig-Tubig: Anti-trafficking conference ugma

Ipahigayon sa Children’s Legal Bureau (CLB) karong Huwebes, Hulyo 22, ang panagtigum alang sa pakigbatok sa tanang porma sa human trafficking.

Giulohan ang maong kalihukan nga Learning from the Survivors: A Conference on Counter-trafficking in Persons’ nga nagtinguha nga mapalanog ang mga suliran sa mga nahimong biktima sa pagpanghimulos ug pagpangabuso diri sa Pilipinas.

Magsugod ang panagtigum alas 8:30 sa buntag hangtod sa alas 5:00 sa hapon.

Agi kini sa pagselebrar sa World Day Against Trafficking (WDAT) nga matag tuig nga gisaulog sa Hulyo 30.

Talagsaon ang higayon nga mahimong sentro sa usa ka kalihukan nga madunggan mismo ang trafficking survivors o mga tao nga maoy gibiktima mismo sa mga mapanghimuslanon sa atong katilingban.

Gawas sa survivors, giimbitar sab ang mga nagkalainlaing service providers sama sa civil society organizations (CSOs) aron mapahibalo sa publiko ang mga serbisyo nga naalagad nila sa mga biktima sa trafficking.

Gitinguha sab sa maong kalihukan nga madunggan ang mga rekomendasyon sa nagkadaiyang sektor sa pagpadayon sa adbokasiya ug pakigbatok sa trafficking.

Dunay mga balaod nga nagpanalipod sa mga Pilipino sa maong krimen sama sa Expanded Anti-Trafficking in Persons Act of 2012.

Apan nasayran pod nga kinahanglan pa nga mas palig-unon pa ang maong balaod aron malikayan nga daghang mahaylo ug mabiktima sa maong krimen.

Hinuon, duna nay mga balaodnon nga gipasar sa Kongreso kabahin sa pag-amyenda sa kasamtangang balaod kon diin aktibo ang Children’s Legal Bureau sa paghatag og rekomendasyon sa pagpanday sa polisiya.

Sa maong panagtigum gipanglantawan sab nga madunggan ang solidarity messages gikan sa mga amahan ug inahan sa mga lokal nga kagamhanan sa Kabisay-an ingon man mga panguo sa mga ahensya sa gobyerno agig pagpakita nga nagkahiusa kitang tanan sa pagsugbo sa trafficking.

Ang trafficking in persons mao ang pagbalhin, paghatod, pagkuha ug uban pang susamang akto pinaagi sa paghaylo, pagpangilad, paghatag og kwarta, pagpamugos ug pagpanghadlok sa usa ka tawo aron mapahimuslan kini sama sa slavery, forced labor, sexual exploitation, pagbaligya sa body organs, ug involuntary servitude.

Giila kini nga bug-at nga krimen nga gitinguhang mahunong dili lang sa gobyerno apil na sab ang pribadong sektor.

Ang CLB usa sa pipila lang ka mga organisasyon diri sa Kabisay-an nga padayon sa pagtabang sa trafficking survivors sa pagrepresentar kanila sa ilang mga kaso batok sa mga akusadong trafficker.

Alang sa mga interesadong musalmot sa maong kalihukan, mahimo ninyong bisitaon ang Facebook page sa Children’s Legal Bureau o pag-register kamo niining maong link aron makaapil sa ZOOM: https://tinyurl.com/VisWideCon2021

Salmot kita ug magkahiusa sa pagpanawagan sa pagtapos sa tanang porma sa trafficking!

[Lindog sinuwat ni Atty. King Anthony Perez, usa sa mga abogado sa CLB. Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]