Mibaha ang simpatiya sa mga Sugboanong opisyal sa kamatayon ni kanhi Cebu Governor Emilio “Lito” Osmeña sa Hulyo 19, 2021.
Si Cebu Governor Gwendolyn Garcia niingon nga si Osmeña maoy naghatag og dungog ug nainila ang Sugbo.
Si Osmeña ang naghimo sa pulong nga “promdi” nga tinahod og kahulogan, di angay ikauwaw.
“We have lost a great man, a Cebuano who believed in and was proud to be a Sugbuanong Probinsyano. Because of that, the word Promdi acquired a new meaning, that of excellence and the capability to achieve great things. Beyond all his remarkable accomplishments, I believe that Lito Osmeña’s greatest legacy will be to have made us all truly proud to be Cebuanos. For that, we, Cebuanos , will be eternally grateful,” matod ni Garcia.
Gitukod ni Osmeña isip partido ang Probinsya Muna Development Initiatives (Promdi) nga iyang gigamit nga partido sa paglansar og bise presidente sa Pilipinas, apan pakyas.
Tumong unta mao ang pagpalambo sa mga ekonomiya sa ubang mga dapit sa nasod gawas sa Metro Manila.
Si Mandaue City Councilor Nerissa Soon-Ruiz, kinsa Provincial Board member sa administrasyon ni Osmeña, nihulagway sa gobernador nga kanunay nag-una sa iyang mga panglantaw alang sa pagpalambo sa ekonomiya.
Matod ni Soon-Ruiz nga wa makab-ot karon ang ekonomikanhong kalamboan sa Sugbo kon wa pa ang kanhi gobernador.
“I grieve the passing of former governor Lito Osmeña, a great Cebuano leader, economic adviser, benefactor, and personal mentor. He was always ahead of his time and Cebu would not be what it is today if not for him and his grand plans like the Transcentral Highway and Ayala Business Park, among others. His bigger than life presence would be missed,” matod ni Soon-Ruiz sa iyang opisyal nga pamahayag.
Si Osmeña mao ang responsable sa paghimo sa kanhi Club Filipino golf course ngadto sa Cebu Business Park pinaagi sa pagbaligya niini ngadto sa mga Ayala ug pagtukod sa Cebu Property Ventures Development Corporation (CPVDC) nga naghimo sa karaang Lahug Airport ngadto sa Asia Town IT Park.
Ang duha ka mga dapit mao ang labing dako nga mga economic hub sa Sugbo, apil sa Kabisay-an ug Mindanao, nga nahimutangan karon sa call centers, hotels, condos ug mga mall.
Gisugdan usab atol sa administrasyon ni Osmeña ang paghimo sa Transcentral Highway (TCH) nga nagpamubo sa biyahe ngadto sa kasadpang central Cebu.
Gisugdan usab sa pagpalambo ang Mactan Cebu International Airport (MCIA) atol sa iyang pamunoan.
Sa iya usab administrasyon nagsugod ang ideya sa pagtukod og trans-axial nga karsada nga molagbas sa kabukiran sa Sugbo gikan sa habagatan padung sa amihanan aron usab pagpadali sa biyahe.
Ang gisugdan sa pagtrabaho karon nga Cebu Expressway nga mopamubo sa biyahe ug mopaluag sa trapiko Metro Cebu gihisgutan usab ni Osmeña atol sa iyang administrasyon.
Si 6th district Representative Emmarie “Lolypop” Ouano-Dizon niingon nga si Osmeña maoy nakaingon nga ang pagka probinsyano di na ikauwaw.
“I mourn the passing of a great public servant, visionary leader, true believer of local autonomy, and a personal mentor. Truly our own, Emilio ‘Lito’ Osmena made us proud as Cebuanos and as probinsiyanos,” nagkanayon si Ouano-Dizon. (KFD, ANV, REV)